ജക്കാര്ത്ത: പതിനെട്ടാമത് ഏഷ്യന് ഗെയിംസിന് വര്ണാഭമായ തുടക്കം. ഫുട്ബോള്, ബാസ്ക്കറ്റ്ബോള്, ഹാന്ഡ്ബോള്, വാട്ടര്പോളോ മത്സരങ്ങള് നേരത്തെ തുടങ്ങിയെങ്കിലും ഇന്ന് മുതലാണ് മെഡലുകള് നിര്ണയിക്കപ്പെടുക. ഇന്ന് 21 സ്വര്ണം തീരുമാനിക്കും.
ഫെന്സിങ്ങിലും ഷൂട്ടിങ്ങിലും രണ്ട് വീതം, ഗുസ്തിയില് അഞ്ച്, നീന്തലില് ഏഴ്, തായ്ക്വന്ഡോ നാലാ, വുഷു ഒന്ന് എന്നിങ്ങനെയാണ് ഇന്നത്തെ സ്വര്ണപ്പോരാട്ടങ്ങള്. ഇന്ത്യ ഏറെ പ്രതീക്ഷ അര്പ്പിക്കുന്നത് ഗുസ്തിയിലാണ്. സുശീല്കുമാര്, ബജ്രംഗ് പൂനിയ, പവന്കുമാര്, മൗസം ഖത്രി, സന്ദീപ് തോമര് എന്നിവരിലൂടെ ആദ്യദിനം മെഡല് പട്ടികയില് ഇടംനേടാമെന്ന പ്രതീക്ഷയിലാണ് ഇന്ത്യ.
മറ്റൊരു മെഡല് നേടുമെന്ന് വിശ്വസിക്കുന്നത് ഷൂട്ടിങ്ങിലാണ്. മിക്സഡ് 10 മീറ്റര് എയര് പിസ്റ്റള് ടീം ഇനത്തില് കൗമാരക്കാരി മനു ഭാക്കറും പരിചയസമ്പന്നനായ അഭിഷേക് വര്മയുമാണ് ഇന്ത്യക്കായി കാഞ്ചിവലിക്കുക. 10 മീറ്റര് എയര്റൈഫിള് മിക്സഡ് ടീം ഇനത്തിലും ഇന്ത്യ ഇന്ന് മത്സരിക്കാനിറങ്ങും. രവികുമാറും അപൂര്വി ചന്ദേലയുമാണ് ഇന്ത്യക്കായി കാഞ്ചിവലിക്കാനിറങ്ങുന്നത്.
