ന്യൂദല്‍ഹി : മുംബൈ ഭീകരാക്രമണത്തിന്റെ മുഖ്യ ആസൂത്രകന്‍ ഡേവിഡ് കോള്‍മാന്‍ ഹെഡ്‌ലിയെ സഹതടവുകാര്‍ ആക്രമിച്ചു. സഹോദരങ്ങളായ രണ്ട് പേരാണ് ആക്രമിച്ചത്. ആക്രമണത്തില്‍ ഗുരുതരമായി പരിക്കേറ്റ ഹെഡ്‌ലിയെ ആശുപത്രി ഐ‌സിയുവിലേക്ക് മാറ്റി.
ജൂലൈ എട്ടിനാണ് ഷിക്കാഗോയിലെ മെട്രോപൊളിറ്റന്‍ കറക്ഷന്‍ സെന്ററില്‍ വച്ചാണ് ഹെഡ്‌ലിക്ക് സഹതടവുകാരില്‍ നിന്നും മര്‍ദനമേറ്റത്. ഇയാളിപ്പോള്‍ തീവ്രപരിചരണ വിഭാഗത്തില്‍ ചികിത്സയിലാണെന്നും അധികൃതര്‍ അറിയിച്ചു. ലഷ്ക്കര്‍ തോയ്ബ ഭീകരപ്രവര്‍ത്തകനായ പാക്-അമേരിക്കന്‍ വംശജന്‍ ഹെഡ്‌ലിയെ മുംബൈ ഭീകരാക്രമണക്കേസില്‍ 35 വര്‍ഷത്തെ തടവുശിക്ഷയ്‌ക്കാണ് വിധിച്ചിരിക്കുന്നത്.
ഇന്ത്യയില്‍ ഭീകരാക്രമണം നടത്താനുള്ള പദ്ധതിയുമായി അമേരിക്കയില്‍ നിന്നും വിമാനം കയറാന്‍ ശ്രമിക്കുന്നതിനിടെ എഫ്‌ബിഐ 2009ല്‍ ഷിക്കാഗോ രാജ്യാന്തര വിമാനത്താവളത്തില്‍ വച്ചാണ് ഹെഡ്‌ലിയെ അറസ്റ്റ് ചെയ്തത്. 2008 നവംബര്‍ 26ന് മുംബൈയില്‍ 166 പേരുടെ മരണത്തില്‍ കലാശിച്ച ഭീകരാക്രമണത്തിന്റെ നിര്‍ണായക പങ്കാളിയാണ് ഹെഡ്‌ലി.
