തൃശൂര് : മണലൂര് നിയോജക മണ്ഡലത്തിലെ തപാല് വോട്ടില് ക്രമക്കേട് ആരോപിച്ച് റീകൗണ്ടിംഗ് ആവശ്യപ്പെട്ട് യു.ഡി.എഫ്. ഇക്കാര്യം ആവശ്യപ്പെട്ട് യു.ഡി.എഫ് ഹൈക്കോടതിയില് ഹര്ജി നല്കും.
മണലൂര് മണ്ഡലത്തിലെ തപാല് വോട്ടുകള് ക്രമാതീതമായി അസാധുവാക്കപ്പെട്ട നടപടിയില് അസ്വാഭാവികതയുണ്ടെന്നാണ് യു ഡി എഫ് ആരോപിക്കുന്നത്. ഇതിനെതിരെ നിയമപോരാട്ടം നടത്തുമെന്നും യു.ഡി.എഫ് സ്ഥാനാര്ത്ഥി ടി.എന്. പ്രതാപന്റെ ചീഫ് ഇലക്ഷന് ഏജന്റ് പറഞ്ഞു.
തപാല് വോട്ടുകള് എണ്ണിയപ്പോള് ഉണ്ടായ ക്രമക്കേടുകള് ചൂണ്ടിക്കാട്ടി യു.ഡി.എഫ് റീ കൗണ്ടിംഗിനായി അപേക്ഷ നല്കിയിട്ടുണ്ട്. അതിന് ശേഷം മാത്രമേ ഔദ്യോഗിക ഫലം പ്രഖ്യാപിക്കാവൂ എന്നും വരണാധികാരിയോട് യു.ഡി.എഫ് ആവശ്യപ്പെട്ടു. പോളിംഗ് ഡ്യൂട്ടിയിലുണ്ടായിരുന്ന ഉദ്യോഗസ്ഥരുടെ ഗുരുതര വീഴ്ചയാണ് 160 വോട്ടുകള് കൂട്ടത്തോടെ അസാധുവാകാന് കാരണമെന്ന് യു.ഡി.എഫ് പറയുന്നു. വോട്ട് രേഖപ്പെടുത്തിയ ശേഷം ബാലറ്റിനൊപ്പം ബാലറ്റിന്റെ കൗണ്ടര് ഫോയില് കൂടി അയക്കാന് പോളിംഗ് ഓഫീസര്മാര് വോട്ടര്മാരെ ബോധപൂര്വം തെറ്റിദ്ധരിപ്പിച്ചതാണ് ഇത്രയധികം വോട്ടുകള് അസാധുവാകാന് ഇടയാക്കിയതെന്ന് യു ഡി എഫ് ആരോപിച്ചു.
മണലൂരില് ഇഞ്ചോടിഞ്ച് പോരാട്ടത്തില് എല്.ഡി.എഫിലെ സി. രവീന്ദ്രനാഥ് 126 വോട്ടുകള്ക്കാണ് ടി.എന്. പ്രതാപനെ പരാജയപ്പെടുത്തിയത്. രവീന്ദ്രനാഥ് 65337 വോട്ടുകള് നേടിയപ്പോള് ടി എന് പ്രതാപന് 65211 വോട്ടുകള് നേടി. ബിജെപി സ്ഥാനാര്ത്ഥി അഡ്വ കെ കെ അനീഷ്കുമാര് 38125 വോട്ട് നേടി.ടി എന് പ്രതാപന്റെ അപരന് എ പ്രതാപന് 184 വോട്ടുകള് നേടിയപ്പോള് രവീന്ദ്രനാഥിന്റെ അപരന് കെ രവീന്ദ്രനാഥ് 234 വോട്ടുകള് നേടി. നോട്ടക്ക് 676 വോട്ടുകളും ലഭിച്ചു.
