വര്ക്കല: ദൈവദശകം സംസ്ഥാന ഗാനമാകട്ടെയെന്ന് ശിവഗിരി ശ്രീനാരായണ ധര്മ സംഘം ട്രസ്റ്റിന്റെ മുഖപത്രമായ ശിവഗിരി മാസികയുടെ മുഖപ്രസംഗം.
കേരളത്തിന് ഒരു സംസ്ഥാനഗാനം വേണമെന്ന മുഖ്യമന്ത്രിയുടെ പ്രസ്താവം സ്വാഗതാര്ഹമാണ്. പല സംസ്ഥാനങ്ങള്ക്കും അവരുടേതായ സംസ്ഥാനഗാനങ്ങളുണ്ട്. ഭാരതത്തിനു ദേശീയഗാനമെന്നപോലെ കേരളത്തിനും ഒരു സംസ്ഥാനഗാനം വേണമെന്നത് കേരളീയജനതയുടെ കൂടി ആഗ്രഹമാണ്. ഈ പശ്ചാത്തലത്തില് കേരളീയ സമൂഹത്തിന്റെ മാനവികതയിലൂന്നിയ നവോത്ഥാനത്തിന് തുടക്കം കുറിച്ച ശ്രീനാരായണഗുരുദേവന് 1914 ല് രചിച്ച ദൈവദശകം സംസ്ഥാനഗാനമായി അംഗീകരിക്കുന്നതിന് സര്ക്കാര് മുന്കൈ എടുക്കണമെന്നാണ് ശിവഗിരിമഠത്തിന്റെ അഭ്യര്ത്ഥന.
‘ജാതിഭേദം മതദ്വേഷം ഏതുമില്ലാതെ സര്വരും സോദരത്വേന വാഴുന്ന മാതൃകാസ്ഥാന’ മായി ഈ ലോകം പരിലസിക്കണമെന്നാഗ്രഹിച്ച് അതിനുവേണ്ടി ആയുസ്സും വപുസ്സും ബലി ചെയ്ത മറ്റൊരു ഗുരുവര്യന് നമുക്കില്ലെന്ന് മുഖപ്രസംഗത്തില് ചൂണ്ടിക്കാണിക്കുന്നു.
ദൈവദശകം എന്ന പ്രാര്ഥനാകാവ്യം മലയാളഭാഷയ്ക്കും കേരളത്തിനും നൈതികതയുടെയും നവീനചിന്തകളുടെയും പുതിയ ഉയരങ്ങളും നിത്യവര്ത്തമാനവുമാണ് നല്കുന്നത്. കേരളസര്ക്കാരിന്റെ അടിയന്തരശ്രദ്ധ ഇക്കാര്യത്തില് പതിയണമെന്നാണ് ശിവഗിരിമഠത്തിന്റെയും ശ്രീനാരായണീയ വിശ്വാസസമൂഹത്തിന്റെയും ആഗ്രഹമെന്നും മുഖപ്രസംഗത്തില് പറയുന്നു.
