കണ്ണൂര്: ക്ഷേത്രഭാരവാഹികളുടെ പേരില് സിപിഎം ജില്ലാ നേതൃത്വത്തിന്റെ ആഭിമുഖ്യത്തില് കണ്വെന്ഷന്. സിപിഎം ജില്ലാ സെക്രട്ടറിയും മലബാര് ദേവസ്വം ബോര്ഡ് പ്രസിഡന്റും പങ്കെടുത്ത കണ്വെന്ഷന് പിന്നില് ജില്ലയിലെ ക്ഷേത്രങ്ങള് കൈപ്പിടിയിലൊതുക്കാനുളള സിപിഎം നീക്കം. ബാലഗോകുലത്തിന്റെ ആഭിമുഖ്യത്തില് കാലങ്ങളായി നടത്തി വരുന്ന ശ്രീകൃഷ്ണ ജയന്തി ആഘോഷം ഉള്പ്പെടെ പരാജയപ്പെടുത്താനും സംസ്ഥാന ഭരണത്തിന്റെ പിന്ബലത്തില് ക്ഷേത്രങ്ങളിലേക്ക് കടന്നു കയറാനുമുളള നീക്കത്തിന്റെ ഭാഗവുമാണ് പാര്ട്ടി അനുഭാവികളായ ക്ഷേത്രഭാരവാഹികളെന്നവകാശപ്പെടുന്ന കപട വിശ്വാസികളുടെ യോഗം കഴിഞ്ഞ ദിവസം വിളിച്ചു ചേര്ത്തത്.
ബാലഗോകുലം നടത്തുന്ന ശ്രീകൃഷ്ണജയന്തി ആഘോഷം തകര്ക്കാനും അലങ്കോലപ്പെടുത്താനും കഴിഞ്ഞ ഒന്ന് രണ്ട് വര്ഷമായി സിപിഎം കണ്ണൂര് ജില്ലാ നേതൃത്വം ശ്രമം നടത്തി വരികയായിരുന്നു. എന്നാല് പാര്ട്ടിയുടെ ശ്രമം ഹൈന്ദവ വിശ്വാസികള് കക്ഷി രാഷ്ട്രീയങ്ങള്ക്കതീതമായി ഘോഷയാത്ര ഉള്പ്പെടെയുളള പരിപാടികളില് പങ്കെടുത്തതോടെ പരാജയപ്പെട്ടിരുന്നു. വലിയ തിരിച്ചടിയായിരുന്നു സിപിഎമ്മിന് ഇതുവഴി ഉണ്ടായത്. കാലാകാലങ്ങളായി നടത്തിവരുന്ന ശോഭയാത്ര വര്ഗ്ഗീയമാണെന്നും മതേതരത്തിനെതിരാണെന്നും വിശ്വാസികള്ക്കിടയില് പ്രചരിപ്പിച്ചെങ്കിലും നാട്ടുകാര് സിപിഎമ്മിന്റെ നടപടിയെ തളളുകയായിരുന്നു. ഇതിനു പുറമേ ഗണേശോത്സവം ഉള്പ്പെടെയുളള പരിപാടികളും സിപിഎം ഏറ്റെടുത്തു നടത്തിയിരുന്നുവെങ്കിലും വേണ്ട രീതിയില് വിജയിച്ചിരുന്നില്ല.
ഹൈന്ദവ വിശ്വാസികളിലേക്ക് കടന്നു ചെല്ലാന് ഏതാനും വര്ഷങ്ങളായി സിപിഎം ശ്രമിച്ചു കൊണ്ടിരിക്കുകയാണ്. ഏറ്റവും ഒടുവില് കത്വ സംഭവത്തിന്റെ പേരില് രാമനുണ്ണിയെ മുന്നിര്ത്തി കടലായി ക്ഷേത്രത്തില് പ്രായശ്ചിത്ത ശയന പ്രദക്ഷിണം എന്ന പേരില് ആഭാസ സമരം സംഘടിപ്പിക്കാന് ശ്രമിക്കുകയും ഒടുവില് ഭക്തജനങ്ങളുടെ എതിര്പ്പിനെ തുടര്ന്ന് പരിപാടി അവസാനിപ്പിക്കേണ്ടി വരികയും ചെയ്തിരുന്നു. സിപിഎം പോഷക സംഘടനയെന്നവകാശപ്പെടുന്ന കടലാസ് സംഘടനയുടെ പേരിലായിരുന്നു പരിപാടി. ഇതേ പോഷക സംഘടനയുടെ നേതൃത്വത്തിലാണ് ക്ഷേത്രഭാരവാഹികളുടെ പേരില് കണ്വെന്ഷന് നടത്തിയത്.
ഭൂരിപക്ഷ മതവിഭാഗങ്ങളുടെ ആരാധനാലയങ്ങളിലേക്ക് വര്ഗ്ഗീയതയും മതേതരവും പറഞ്ഞ് കയറിച്ചെല്ലാനുളള നീക്കത്തില് പാര്ട്ടിക്കുളളില് തന്നെ അഭിപ്രായ ഭിന്നത ഉടലെടുത്തിട്ടുണ്ട്. ശാന്തിയും സമാധാനവും നിലനില്ക്കുന്ന ക്ഷേത്രാങ്കണങ്ങളെ രാഷ്ട്രീയ വേദിയാക്കി മാറ്റാനുളള ഗൂഢനീക്കത്തിനെതിരെ ശക്തമായ പ്രതിഷേധം ഉയര്ന്നിട്ടുണ്ട്. മതേതരത്വം ചൂണ്ടിക്കാട്ടി എന്തുകൊണ്ട് ന്യൂനപക്ഷങ്ങളുടെ ആരാധനാലയങ്ങളിലേക്ക് പോകാന് പാര്ട്ടി തയ്യാറാകുന്നില്ലെന്ന ചോദ്യവും ഉയര്ന്നിട്ടുണ്ട്.
ശ്രീകൃഷ്ണജയന്തി ഘോഷയാത്ര പോലെ കുട്ടികളെ വര്ഗ്ഗീയവല്ക്കരിക്കുന്നതിനുള്ള പ്രവര്ത്തനങ്ങള്ക്ക് ക്ഷേത്ര കോമ്പൗണ്ടുകള് അനുവദിക്കരുതെന്ന് കഴിഞ്ഞ ദിവസം ചേര്ന്ന സിപിഎം കണ്വെന്ഷന് തീരുമാനിക്കുകയുണ്ടായി. കത്വ സംഭവത്തെ കണ്വെന്ഷന് അപലപിക്കുകയും ചെയ്തു. ഇതില് നിന്നു തന്നെ സിപിഎമ്മിന്റെ രാഷ്ട്രീയ ലക്ഷ്യം വ്യക്തമാണ്. മലബാര് ദേവസ്വം ബോര്ഡ് പ്രസിഡണ്ട് ഒ.കെ.വാസുവും സിപിഎം ജില്ലാ സെക്രട്ടറി പി.ജയരാജനും സിപിഎം സഹയാത്രികരായ ചില കപട ആധ്യാത്മികവാദികളുമാണ് കണ്വെന്ഷനില് പങ്കെടുത്തത്.
