വാര്ത്തയില്നിന്ന്:
….പെരുവനം കുട്ടന്മാരാരാണ് മേളത്തിന് ‘പ്രണാമം’ വഹിച്ചത്….
‘പ്രമാണം’ ‘പ്രണാമ’മായത് അക്ഷരത്തെറ്റാണെന്ന് ആശ്വസിക്കാം. ചിലര്ക്ക് ‘്രപമാണം’ വഹിക്കാനുള്ളതല്ല, അര്പ്പിക്കാനുള്ളതാണ്!
….ഒട്ടേറെപ്പേര് അദ്ദേഹത്തിന് ‘പ്രമാണ’മര്പ്പിച്ചു.
ചിലര് ‘സാഷ്ഠാംഗം’ പ്രണമിക്കാറുണ്ട്. ‘എട്ടംഗങ്ങളും’ എന്ന അര്ത്ഥത്തില് ‘സാഷ്ടാംഗം’ എന്നാണു വേണ്ടത്. ‘സാഷ്ഠാംഗ’ത്തിന്റെ മേന്മ ‘സാഷ്ടാംഗ’ത്തിനില്ലെന്ന് അവര് കരുതുന്നുണ്ടാകാം!
‘സാഷ്ഠാംഗ’ത്തെപ്പോലെ പ്രചാരം ‘അഷ്ഠപദി’ക്കുമുണ്ട്. ചിലര്ക്ക് ‘അഷ്ഠപദി’ മതി. ‘അഷ്ടപദി’ ശരിരൂപം. എട്ടെട്ടു ചരണങ്ങളടങ്ങിയ ഗീതങ്ങളാണ് ജയദേവരുടെ ‘ഗീതഗോവിന്ദ’ത്തിലുള്ളത്. അതുകൊണ്ട് ആ കാവ്യത്തിന് ‘അഷ്ടപദി’ എന്നും പേരുണ്ടായി. ‘ഗീതഗോവിന്ദ’ത്തെ ചിലര് ‘ഗീതാഗോവിന്ദ’മാക്കാറുണ്ട്.
‘സന്തുഷ്ടി’ എന്ന ശരിരൂപം ‘സന്തുഷ്ഠി’യാക്കുന്നവരുണ്ട്. സന്തുഷ്ഠരെയും സന്തുഷ്ഠി പ്രകടിപ്പിക്കുന്നവരെയും പലേടത്തും കാണാം! എന്നാല് ‘സന്തുഷ്ഠ’രില് പലര്ക്കും ‘സ്വാദിഷ്ഠ’മായ വിഭവങ്ങള് വേണ്ട! ‘സ്വാദിഷ്ട’മായവ തന്നെ വേണം! ‘സ്വാദിഷ്ഠം’ ശരി.
കേരളീയര് പൊതുവെ ‘ആഢംബര’പ്രിയരാണ്. ശരിരൂപമായ ആഡംബരം’ പലപ്പോഴും അവഗണിക്കപ്പെടുന്നു. ‘പീഡനം’ ദുര്ബലമാണെന്നു കരുതി ചിലര് അതിനു ശക്തികൂട്ടി ‘പീഢന’മാക്കുന്നു. ‘സ്ത്രീപീഢനങ്ങള്’ വര്ധിക്കുന്നതില് പലരും അസ്വസ്ഥരാണ്!
‘യാദൃച്ഛിക’മാണ് ശരിയായ രൂപമെന്ന് ഭാഷാസ്നേഹികള് ഇടയ്ക്കിടെ ഓര്മ്മിപ്പിക്കാറുണ്ടെങ്കിലും പലരും ‘യാദൃശ്ഛികം’ ഉപേക്ഷിക്കുന്നില്ല. ചില പ്രസിദ്ധീകരണങ്ങളില് കാണാറുള്ള ‘യാദൃശ്ചികം’ ‘യാദൃച്ഛിക’മാണെന്ന് എങ്ങനെ കരുതും? ‘നിശ്ചയം’ ചിലര്ക്ക് എഴുത്തില് ‘നിച്ഛയ’വും സംസാരത്തില് ‘നിച്ചയ’വുമാകുന്നു!
‘സാന്ത്വനം’ എന്നെഴുതിയാല് ചിലര് അതു തെറ്റിച്ച് ‘സ്വാന്തനം’ ആക്കും.
”ഇതിലെ ചില കവിതകളെ സ്വാന്തനഗീതങ്ങളെന്നു വിശേഷിപ്പിക്കാം” എന്ന് ഈയിടെ ഒരു പുസ്തകനിരൂപണത്തില് കണ്ടു.
”സ്വാന്തനിപ്പിക്കാന് ആരുമില്ലാതെ ഒരു കുടുംബം” (പത്രവാര്ത്ത).
‘സൈ്വരം’ ചിലര്ക്കിപ്പോഴും ‘സൈ്വര്യ’മാണ്. അവര് ഭാഷാസ്നേഹികളുടെ ‘സൈ്വരം’ കെടുത്തിക്കൊണ്ടിരിക്കും!
‘പരിണാമ’ത്തിന് അവസ്ഥാഭേദം, മാറ്റം എന്നൊക്കെയാണ് അര്ത്ഥം. പലര്ക്കും ‘പരിണാമം’ ‘അളവ്’ എന്നര്ത്ഥമുള്ള ‘പരിമാണം’ ആകുന്നു. ഇതും അക്ഷരത്തെറ്റെന്ന് കരുതി ആശ്വസിക്കാം. ”പരിമാണ പ്രക്രിയക്ക് അവസാനമില്ലല്ലോ” എന്നാണ് ഒരു നേതാവ് ഈയിടെ പറഞ്ഞത്.
‘ഗ്രൂപ്പുപോര്: അണികളില് അലോരസം’ എന്നായിരുന്നു ഒരു വാര്ത്തയുടെ തലക്കെട്ട്. ‘അലോസര’മാണ് ‘അലോസര’മായതെന്ന് എഴുതിയ ആള് അറിഞ്ഞുകാണില്ല! വായനക്കാര്ക്ക് രസിക്കാം!
‘വ്യത്യാസമുള്ളത്’ എന്നര്ത്ഥം കിട്ടാന് ‘വ്യത്യസ്തം’ എന്നെഴുതണം. പലര്ക്കുമിത് ‘വ്യത്യസ്ഥ’മാണ്. വിശ്വസിക്കപ്പെടുന്നവന് ‘വിശ്വസ്ത’നാണെങ്കിലും ചിലര് അയാളെ ‘വിശ്വസ്ഥ’നാക്കും. വിദ്യ അഭ്യസിച്ചവരിലും ‘അഭ്യസ്ഥവിദ്യര്’ ഏറെയുണ്ട്! ‘അഭ്യസ്തവിദ്യര്’ ശരി.
പിന്കുറിപ്പ്:
പത്രവാര്ത്തകളില്നിന്ന്:
”….ഒരാഴ്ച നീണ്ടുനില്ക്കുന്ന വായന വാരാഘോഷം (അക്ഷരക്കൊയ്ത്ത്) സംഘടിപ്പിക്കുന്നു. രാവിലെ 10 ന് നടക്കുന്ന ചടങ്ങില് ‘അക്ഷരക്കൊയ്ത്ത്’ ഉദ്ഘാടനം ചെയ്യും.”
”….ഇനി തുലാവര്ഷം അവസാനിക്കുംവരെ മഴക്കാലമാണ്. നമ്മള് മലയാളികള്ക്ക് ഈ മഴയെ വേണ്ടവിധം കൊയ്താല് വരള്ച്ചയില്ലാത്ത മേടം കടന്നുകൂടാനാകും. വീടുകളില്നിന്നാകട്ടെ നമ്മുടെ മഴക്കൊയ്ത്ത്….”
കേരളത്തില് ഇപ്പോള് മഴക്കാലമല്ല, കൊയ്ത്തുകാലമാണ്! മഴക്കൊയ്ത്തിനെക്കാള് ആദായകരം ‘ഞാറ്റുവേലക്കൊയ്ത്താ’ണെന്ന് ചിലര് പറയുന്നു!.
എസ്കെ
