തലശ്ശേരി: മുനിസിപ്പാലിറ്റിയിലെ ജനങ്ങളുടെ ആരോഗ്യ ശുചിത്വ കാര്യങ്ങള് നോക്കിനടത്താനായി നഗരമധ്യത്തില് പ്രവര്ത്തിക്കുന്ന ഹെല്ത്ത് ഇന്സ്പക്ടര് കാര്യാലയത്തിന്റെ മുകളിള് ആരോഗ്യത്തിന് ഹാനികരമായ മയക്കുമരുന്ന് ശേഖരം കൊണ്ടുവച്ച് ലഹരി മാഫിയകളുടെ വിളയാട്ടം. തലശ്ശേരി പഴയ ബസ്സ്റ്റാന്റിലെ ജനറല് ആശുപത്രിക്ക് മുന്നിലുള്ള മൂപ്പന്സ് റോഡില് സ്ഥിതി ചെയ്യുന്ന നഗരസഭാ കെട്ടിടത്തിന്റെ ടെറസില് സൂക്ഷിച്ച നിലയില് രണ്ട് കിലോയിലധികം കഞ്ചാവും 51 ഗ്രാം ബ്രൗണ്ഷുഗറും തലശ്ശേരി പോലീസ് കസ്റ്റഡിയിലെടുത്തു. പ്ലാസ്റ്റിക് ബാഗില് സൂക്ഷിച്ച ലഹരി വസ്തുക്കള് രഹസ്യവിവരം ലഭിച്ചതിനെ തുടര്ന്നാണ് പിടികൂടിയത്. ഇവ കോടതിയില് ഹാജരാക്കുമെന്ന് പോലിസ് പറഞ്ഞു. മയക്ക് മരുന്ന് വസ്തുക്കള് എത്തിച്ചയാളെ കണ്ടെത്താന് അന്വേഷണം തുടങ്ങിയിട്ടുണ്ട്.
തലശ്ശേരിയുടെ വിവിധ ഭാഗങ്ങളില് ലഹരി വസ്തുക്കള് ഇപ്പോള് സുലഭമാണ്. സ്കൂള് തുറക്കുന്നതോടെ മുതിര്ന്ന വിദ്യാര്ത്ഥികളെ ലക്ഷ്യം വച്ച് സ്ഥിരം ഇടപാടുകാര് കഞ്ചാവ് ബീഡികളും ബ്രൗണ് ഷുഗര് പാക്കറ്റുകളും മയക്ക് ഗുളികകളൂം വ്യാപകമായി ശേഖരിച്ചു സൂക്ഷിച്ചിട്ടുണ്ടെന്ന് സൂചനകളുണ്ട്. പോലീസും എക്സൈസും അന്വേഷണം നടത്തുന്നുണ്ടെങ്കിലും മയക്ക് മരുന്നിന്റെ പ്രധാന ഏജന്റുമാരെ ഇതേവരെ കണ്ടെത്താനായിട്ടില്ല.
