ത്രിപുരയിലെ കോണ്ഗ്രസ് പാര്ട്ടി മുഴുവനായി ബിജെപിയിലേക്ക് പോയതാണ് ബിജെപിയുടെ വിജയത്തിന് കാരണമെന്നു മുഖ്യമന്ത്രി പിണറായി വിജയന്. കൂട്ടത്തില് സിപിഎമ്മുകാരും ബിജെപിക്കു വോട്ടു ചെയ്തത് അവരുടെ വിജയം എളുപ്പമാക്കി എന്നുകൂടി പറയാമായിരുന്നു. സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്റെ കണ്ടെത്തലാണ് ഇതിലും വിചിത്രം. കോര്പറേറ്റുകള് ഒന്നടങ്കം ബിജെപിക്കുവേണ്ടി പണമെറിഞ്ഞതാണ് സിപിഎമ്മിന്റ പരാജയത്തിനു കാരണമായി അദ്ദേഹം കാണുന്നത്. കോര്പ്പറേറ്റ് പണത്തിന്റെ കാര്യത്തില് മാര്ക്സിസ്റ്റു പാര്ട്ടിയും മോശക്കാരല്ലല്ലോ? ത്രിപുരയില് വേരോട്ടമില്ലാത്തതിനാലാകണം യൂസഫലി, രവി പിള്ള തുടങ്ങിയ കോര്പറേറ്റുകളുടെ മണി പവര് അവിടെ ഏശാതെ പോയത് .
വോട്ടിങ് മെഷീനെ പഴിചാരലായിരുന്നു പരാജയത്തിന് വ്യാഖ്യാനമായി നാളിതുവരെ സ്വീകരിച്ചുപോന്നത്. പക്ഷേ ഈ ന്യായവാദം വെള്ളം തൊടാതെ വിഴുങ്ങാന് ആളെ കിട്ടാതായതുകൊണ്ടാണ് ഇക്കുറി കോര്പ്പറേറ്റുകളെ പിടിച്ചത്. ത്രിപുരയില് പണമെറിഞ്ഞ കോര്പ്പറേറ്റുകളെക്കുറിച്ച് അറിയാമെങ്കില് അവരുടെ പേരുവിവരം വെളിപ്പെടുത്തുവാനുള്ള ആര്ജവം സെക്രട്ടറി കാണിക്കേണ്ടതായിരുന്നു. കോര്പ്പറേറ്റുകള് ആരുതന്നെയായാലും അവരില് റിലയന്സ് മുതലാളി മുകേഷ് അംബാനി ഇല്ലെന്നു തന്നെ ഉറപ്പിക്കാം. കേബിള് കുഴിച്ചിടുന്ന കാര്യത്തില് അംബാ നിയുമായി ചങ്ങാത്തമുള്ള കാര്യം അത്ര രഹസ്യമൊന്നുമല്ലല്ലോ?
ത്രിപുരയില് പരാജയം നേരിട്ടെങ്കിലും സിപിഎമ്മിന്റെ ജനകീയ അടിത്തറ നഷ്ടപ്പെട്ടിട്ടില്ല എന്ന കണ്ടെത്തല് ആശ്വാസദായകമാണ്. ഇതുതന്നെയല്ലേ ബംഗാളിനെപ്പറ്റിയും പറഞ്ഞുകൊണ്ടിരുന്നത്? ബംഗാളില് നിന്നുള്ള പൊളിറ്റ് ബ്യൂറോ അംഗങ്ങള്ക്ക് യാതൊരുവിധ കുറവും സംഭവിച്ചിട്ടില്ല.
ത്രിപുരയിലെ സംഭവ വികാസത്തില് നിന്ന് പാഠം പഠിക്കാതെ പഴയ പടി അക്രമവും അശാന്തിയും അഴിമതി മൂടിവെയ്ക്കലും തുടര്ന്നാല് കേരളവും ബംഗാള്- ത്രിപുര മോഡല് പിന്തുടരുമെന്ന് കേരളത്തിലെ ഇടതുപക്ഷം മനസ്സിലാക്കിയാല് കൊള്ളാം.
കെ.എ. സോളമന്, ചേര്ത്തല
