ഇരിക്കൂര്: ഊരത്തൂരില് തലയോട്ടി കണ്ടെത്തിയ സംഭവത്തില് പോലീസ് അന്വേഷണം ഇഴഞ്ഞുനീങ്ങുന്നു. അതേസമയം കണ്ടെത്തിയ തലയോട്ടി സ്ത്രീയുടേതാണെന്ന് മെഡിക്കല് റിപ്പോര്ട്ട്. പരിയാരം മെഡിക്കല് കോളജില് നടത്തിയ പരിശോധനാ റിപ്പോര്ട്ട് ഫോറന്സിക് വിദഗ്ധന് ഇരിക്കൂര് പോലീസിന് കൈമാറിയിട്ടുണ്ട്. 22നും 40നും മധ്യേ പ്രായമുള്ള സ്ത്രീയുടേതാണ് തലയോട്ടിയെന്നും മരണപ്പെട്ടിട്ട് ആറ് മാസത്തോളമായെന്നും റിപ്പോര്ട്ടില് പറയുന്നു. ഡിഎന്എ പരിശോധനക്കായി തലയോട്ടി അടുത്ത ദിവസം തിരുവനന്തപുരത്തേക്ക് കൊണ്ടുപോകും.
തലയോട്ടികണ്ടെത്തിയ സ്ഥലത്തിനു സമീപം എല്ലുകളും കണ്ടെത്തിയിട്ടുണ്ട്. തലയോട്ടി കണ്ടെത്തിയ ഊരത്തൂര് പിഎച്ച്സിക്ക് സമീപത്താണ് കഴിഞ്ഞ ദിവസം പ്രദേശവാസിയായ ഒരാള് എല്ലുകള് കണ്ടെത്തിയത്. ഇതും ഇരിക്കൂര് പോലീസ് കസ്റ്റഡിയിലെടുത്തു. ഇരിക്കൂര് എസ്ഐയുടെ നേതൃത്വത്തില് സംഭവത്തില് വിശദമായ അന്വേഷണം നടക്കുന്നുണ്ടെങ്കിലും കാര്യമായ സൂചനകളൊന്നും ലഭിച്ചിട്ടില്ല. ശനിയാഴ്ച വൈകുന്നേരമാണ് ഊരത്തൂര് പിഎച്ച്സിക്ക് സമീപം ഊരത്തൂര് കല്ല്യാട് റോഡില് നിന്നും അമ്പത് മീറ്റര് മാറി സ്വകാര്യ വ്യക്തിയുടെ പറമ്പില് തലയോട്ടി കണ്ടെത്തിയത്.
ഈ പ്രദേശങ്ങളിലെല്ലാം നിരവധി ചെങ്കല് ക്വാറികള് സ്ഥിതിചെയ്യുന്നുണ്ട്. അന്യസംസ്ഥാനക്കാരായ ആയിരത്തിലേറെപേര് ജോലി ചെയ്യുന്ന പ്രദേശം കൂടിയാണ് ഇത്. നിരവധി അന്യസംസ്ഥാന തൊഴിലാളികള് കുടുംബവുമൊത്ത് ഇവിടെ താമസിച്ച് ജോലി ചെയ്യുന്നുണ്ട്. സമീപകാലത്തൊന്നും ഈ പ്രദേശങ്ങളില് മൃതദേഹം ദഹിപ്പിക്കാതെ സംസ്കരിച്ചിട്ടില്ല. പഞ്ചായത്ത് പൊതുശ്മശാനം ഇവിടെ ഉണ്ടെങ്കിലും ഇവിടെയെത്തുന്ന മൃതദേഹങ്ങള് പൂര്ണ്ണമായും ദഹിച്ച് കഴിഞ്ഞാലേ മറ്റ് കര്മ്മങ്ങള് നടത്താറുള്ളൂ. അതുകൊണ്ട് തന്നെ ഇവിടെനിന്നും തലയോട്ടി നായയോ മറ്റോ കടിച്ചുകൊണ്ടുപോകാന് സാധ്യതയില്ല. സംഭവത്തിലെ സമഗ്രമായ അന്വേഷണം നടത്തണമെന്നാണ് നാട്ടുകാരുടെ ആവശ്യം.
