ഏറ്റവും ആസ്തിയുള്ള രാജ്യങ്ങളില്‍ ഇന്ത്യ ആറാമത്

ന്യൂദല്‍ഹി : ലോകത്തില്‍ ഏറ്റവും കൂടുതല്‍ ആസ്തിയുള്ള രാജ്യങ്ങളുടെ പട്ടികയില്‍ ഇന്ത്യ ആറാം സ്ഥാനത്ത്. യുഎസ് ഒന്നാം സ്ഥാനത്തുള്ള പട്ടികയില്‍ 8,230 ലക്ഷം കോടി യുഎസ് ഡോളറാണ് ഇന്ത്യയുടെ ആസ്തി. 2017ലെ ന്യൂവേള്‍ഡ് വെല്‍ത്ത് പുറത്തുവിട്ട റിപ്പോര്‍ട്ടിലാണ് ഇതുസംബന്ധിച്ചുള്ള വിവരങ്ങള്‍ പുറത്തുവന്നിരിക്കുന്നത്. 

64,584 ലക്ഷംകോടി യുഎസ് ഡോളറാണ് യുഎസിന്റെ ആസ്തി. ചൈനയാണ് രണ്ടാം സ്ഥാനത്ത്, 24,803 ലക്ഷം കോടി ഡോളര്‍. മൂന്നാമതുള്ള ജപ്പാന് 19,522 ലക്ഷംകോടി ഡോളര്‍ ആസ്തിയുണ്ട്. 

രാജ്യത്തെ വ്യക്തിഗത സ്വത്തുവരവുകള്‍, ബാധ്യതകള്‍ എന്നിവ കണക്കാക്കിയാണ് ന്യൂ വേള്‍ഡ് പട്ടിക തയ്യാറാക്കിയിരിക്കുന്നത്. എന്നാല്‍ ഗവണ്‍മെന്റ് ഫണ്ടുകളെ ഇതില്‍ നിന്ന് ഒഴിവാക്കിയിട്ടുണ്ട്. 

ബ്രിട്ടണ്‍ (9,919 ലക്ഷംകോടി ഡോളര്‍), ജര്‍മ്മനി(9,660 ലക്ഷംകോടി) എന്നീ രാജ്യങ്ങളാണ് നാലും അഞ്ചും സ്ഥാനത്ത്. 

2017ല്‍ ഇന്ത്യയുടെ സമ്പത്തില്‍ 25 ശതമാനം വളര്‍ച്ച ഉണ്ടായിട്ടുണ്ട്. 2016ല്‍ 6,584 ലക്ഷം കോടി ഡോളറായിരുന്നത് കഴിഞ്ഞ വര്‍ഷം 8,230 ലക്ഷം കോടയായി ഉയര്‍ന്നു.