ന്യൂദൽഹി: ദൽഹിയിലെ രാജീവ് ചൗക്ക് മെട്രോ സ്റ്റേഷനിൽ ഇന്ന് രാത്രി 9 മണിക്ക് ശേഷം യാത്രക്കാരെ അനുവദിക്കില്ലെന്ന് ഡിഎംആർസി അറിയിച്ചു. പുതുവത്സരാഘോഷത്തിന്റെ സുരക്ഷ മുൻ നിർത്തിയാണ് അധികൃതർ ഇത്തരത്തിലൊരു തീരുമാനം കൈക്കൊണ്ടത്. അറിയിപ്പ് ദൽഹി പോലീസിന് നൽകി.
അതേ സമയം രാജീവ് ചൗക്ക് മെട്രോ സ്റ്റേഷനിലെ എഫ്,ബി ബ്ലോക്ക് ഗേറ്റുകൾ രാത്രി 9 മണിക്ക് ശേഷവും തുറന്ന് കൊടുക്കും. കൊണാട്ട് പ്ലേസ് തുടങ്ങിയ പ്രദേശങ്ങളിലേക്ക് സഞ്ചരിക്കുന്നതിനു വേണ്ടിയാണ് ഈ ഗേറ്റുകൾ തുറക്കുന്നത്.
ലൈൻ-2 (ഹുഡ സിറ്റി സെന്റർ-സമയ്പൂർ ബാദ്ലി), ലൈൻ -3 / 4 (ദ്വാരക സെക്ടർ 21-നോയ്ഡ സിറ്റി സെന്റർ / വൈശാലി) ഇടയിലുള്ള ഇന്റർചേഞ്ച് സൗകര്യം രാജീവ് ചൗക്ക് മെട്രോ സ്റ്റേഷനിൽ പതിവായി തുടരും. ബാക്കി മെട്രോയിലെ എല്ലാ സ്റ്റേഷനുകളും സാധാരണ നിലയിൽ പ്രവർത്തിക്കുമെന്നും മെട്രോ അധികൃതർ അറിയിച്ചു.
