തിരുവനന്തപുരം: സെക്രട്ടേറിയറ്റിനു മുമ്പില് കാലപരിധിയില്ലാതെ സമരപന്തലുകള് സ്ഥാപിച്ച് സ്ത്രീകളുടെയും കുട്ടികളുടെയും സഞ്ചാരസ്വാതന്ത്ര്യം നിഷേധിക്കുന്ന പ്രവണത ഒഴിവാക്കാന് കളക്ടറും നഗരസഭാ സെക്രട്ടറിയും ജില്ലാ പോലീസ് മേധാവിയും നടപടി സ്വീകരിക്കണമെന്ന് സംസ്ഥാന മനുഷ്യാവകാശ കമ്മീഷന്.
രാഷ്ട്രീയപ്പാര്ട്ടികള്ക്കും സംഘടനകള്ക്കും പ്രതിഷേധിക്കാന് അവകാശമുണ്ടെങ്കിലും അത് സാധാരണക്കാരുടെ സഞ്ചാര സ്വാതന്ത്ര്യത്തെ ബാധിക്കരുതെന്നും കമ്മീഷന് ആക്റ്റിംഗ് അധ്യക്ഷന് പി. മോഹനദാസ് ഉത്തരവില് പറഞ്ഞു. നഗരസഭാ റോഡ് വികസനപദ്ധതിയുടെ ഭാഗമായി നിര്മിച്ച 42 കിലോമീറ്റര് റോഡിന്റെ നടപ്പാതയില് വ്യാപാരസ്ഥാപനങ്ങളുടെ കൈയേറ്റവും വഴിവാണിഭവും അടിയന്തരമായി ഒഴിവാക്കണം. സ്വീകരിച്ച നടപടി രണ്ടുമാസത്തിനകം അറിയിക്കണമെന്നും കമ്മീഷന് നിര്ദ്ദേശിച്ചു.
തൊണ്ണൂറുകാരനായ മുന് ഡിവൈഎസ്പി എം. കൃഷ്ണന് നായര് സമര്പ്പിച്ച പരാതിയിലാണ് നടപടി. നഗരസഭാ ഭരണാധികാരികള് ഇഷ്ടമില്ലാത്തവരെ ഒഴിപ്പിക്കുകയും ഇഷ്ടക്കാരെ തുടരാന് അനുവദിക്കുകയും ചെയ്യുന്നെന്ന് കമ്മീഷന് നിരീക്ഷിച്ചു. വന്കിട സ്ഥാപനങ്ങള് പരാതി നല്കിയാല് കൈയേറ്റക്കാരെ ഒഴിപ്പിക്കാന് നഗരസഭ പ്രതേ്യകം ശ്രദ്ധിക്കുമെന്ന വസ്തുതയും കമ്മീഷന് ഉത്തരവില് എടുത്തു പറഞ്ഞു.
