തളിപ്പറമ്പ്: വ്യാജലോട്ടറി വില്പനയുമായി ബന്ധപ്പെട്ട് പോലീസ് റെയ്ഡ് ശക്തമാക്കി. കഴിഞ്ഞ ദിവസം തളിപ്പറമ്പില് അറസ്റ്റിലായ മൂന്നുപേരില് നിന്നും ലഭിച്ച വിവരങ്ങളുടെ അടിസ്ഥാനത്തില് ജില്ലയുടെ വിവിധ ഭാഗങ്ങളില്പോലീസ് റെയ്ഡ് നടത്തിയിരുന്നു. ഇതിന്റെ അടിസ്ഥാനത്തില് ഇത്തരം ലോട്ടറി വില്പ്പനക്ക് പിന്നില്വന് റാക്കറ്റുതന്നെ പ്രവര്ത്തിക്കുന്നതായാണ് സൂചന.
ലക്ഷക്കണക്കിന് രൂപയുടെ ഇടപാടുകളാണ് ഇത്തരം സമാന്തര ലോട്ടറി വില്പനയിലൂടെ നടന്നുവരുന്നത്. അന്തര്സംസ്ഥാന ലോട്ടറി മാഫിയ സംഘത്തിലെ നാല്പേരെയാണ് കഴിഞ്ഞ ദിവസം തളിപ്പറമ്പില് പിടികൂടിയത്. ഇതിലൊരാളെ നേരത്തെയും ഇയാള് നിന്നും കിട്ടിയവിവരത്തിന്റെ അടിസ്ഥാനത്തില് തുടര്ന്ന മൂന്നുപേരെയുമാണ് അറസ്റ്റ് ചെയ്തത്. തറമ്മില് കൃഷ്ണന്, പൂക്കോത്ത് തെരുവിലെ പി.സുനില്, പട്ടുവം മുള്ളൂരിലെ കെ.പവിത്രന്, കടമ്പേരിയിലെ വി.വേണുഗോപാലന് എന്നിവരാണ് അറസ്റ്റിലായത്.
കൃഷ്ണനുമായി ബന്ധപ്പെട്ട ഫോണ് കോളുകള് പരിശോധിച്ചപ്പോഴാണ് ജില്ലയില് സമാന്തര ലോട്ടറി വ്യാപകമായി വിറ്റഴിക്കുന്നതായി തെളിഞ്ഞത്. ഇതുമായി ബന്ധപ്പെട്ട് പ്രധാനകണ്ണികളായ മൂന്നുപേരെ പിടികൂടാനായി പോലീസ് വലവീശിയിട്ടുണ്ട്. ഇന്നലെ ജില്ലയിലെ തലശ്ശേരി, പയ്യന്നൂര്, തളിപ്പറമ്പ് തുടങ്ങിയ സ്ഥലങ്ങളിലെ ലോട്ടറി സ്റ്റാളുകളില് പോലീസ് റെയ്ഡ് നടത്തിയിരുന്നു. തളിപ്പറമ്പ് ഡിവൈഎസ്പിക്ക് കിട്ടിയ രഹസ്യ വിവരത്തിന്റെ അടിസ്ഥാനത്തിലാണ് കുവേരിയിലെ ലക്ഷ്മണന് പിടിയിലായത്.
സംസ്ഥാനത്തെ തന്നെ പ്രമുഖ ലോട്ടറി ഏജന്സി കേന്ദ്രീകരിച്ചാണ് സമാന്തര ലോട്ടറി വില്പന നടത്തുന്നതെന്ന ഞെട്ടിക്കുന്ന വിവരമാണ് പോലീസ് അന്വേഷണത്തില് തെളിഞ്ഞിട്ടുള്ളത്. അയ്യായിരം രൂപയാണ് സമ്മാനം നല്കുന്നത്. ടിക്കറ്റിന് പകരം കേരള ലോട്ടറി ടിക്കറ്റിലെ അവസാന മൂന്ന് നമ്പര് എഴുതി നല്കുന്ന ലോട്ടറി ഒന്നിന് പത്ത് രൂപയാണ് വില. ഇത്തരത്തില് പ്രതിദിനം പതിനായിരക്കണക്കിന് രൂപയുടെ ലോട്ടറി വാങ്ങുന്നവര് ജില്ലയില് ഉണ്ടെന്നാണ് വിവരം.
വലിയ ഇടപാടുകാര്ക്ക് ഇഷ്ടനമ്പറുകള് തെരഞ്ഞെടുക്കാന് അവസരമുണ്ടാകും. ലോട്ടറി നടത്തിപ്പുകാര് സ്വയം പ്രഖ്യാപിക്കുന്നതും സര്ക്കാര് നറുക്കെടുക്കാത്തതുമായ നമ്പറുകള്ക്കാണ് സമ്മാനം പ്രഖ്യാപിക്കുക. സമ്മാനത്തുക അപ്പോള് തന്നെ നല്കുകയും ചെയ്യും. ഇത്തരത്തിലുള്ള സംഘത്തില് പെട്ടവര് പ്രതിദിനം അരലക്ഷം രൂപയുടെ ടിക്കറ്റ് വില്പന നടത്തുന്നതായാണ് അറിയുന്നത്. ഇതുവഴി സര്ക്കാരിന് വന് നികുതി നഷ്ടമാണ് സംഭവിക്കുന്നത്. ഡിവൈഎസ്പിയുടെ പ്രത്യേക ക്രൈം സ്ക്വാഡില് പെട്ടവരാണ് അന്വേഷണം നടത്തുന്നത്.
