കോട്ടയം: റോഡ് നവീകരണത്തിന്റെ ഭാഗമായി തുടങ്ങിയ ആകാശപാത നിര്മ്മാണം പ്രതിസന്ധിയില്. അഞ്ചു റോഡുകള് സന്ധിക്കുന്ന കോട്ടയം നഗരത്തിലെ ശീമാട്ടി റൗണ്ടാന ആകാശപാതയ്ക്കായി പൊളിച്ചിട്ട് ഒന്നരവര്ഷത്തോളമാകുന്നു. പുതിയ പദ്ധതി കാല്നട യാത്രക്കാര്ക്ക് അനുഗ്രഹമാകുമെന്ന് സ്വപ്നം കണ്ടവര്ക്ക് മുന്നില് ആകാശം മുട്ടി നില്ക്കുന്ന ഫ്ളക്സ് ബോര്ഡുകളും ജനങ്ങളെ വലയ്ക്കുന്ന ഗതാഗത കുരുക്കുമാണ് ആകാശപ്പാതയുടെ ബാക്കി.
കഴിഞ്ഞ യുഡിഎഫ്് സര്ക്കാരിന്റെ കാലത്ത് ഗതാഗത മന്ത്രിയായിരുന്ന തിരുവഞ്ചൂര് രാധാകൃഷ്ണന് തുടങ്ങിയ പദ്ധതിയാണ് ആകാശപാത. പദ്ധതിയുടെ തുടക്കത്തില് ചില എതിര്പ്പുകള് ഉണ്ടായിരുന്നു. പദ്ധതി അട്ടിമറിക്കാനുള്ള നീക്കങ്ങളും പലഭാഗത്തു നിന്നും ഉണ്ടായി. ഇത് അവഗണിച്ചാണ് പദ്ധതിക്ക് തുടക്കമിട്ടത്. അഞ്ച് കോടി രൂപയാണ് ഇതിനായി നീക്കിവച്ചിരിക്കുന്നത്. ഭരണം മാറിയതോടെ നഗരത്തിന്റെ വികസനത്തിന് വഴിയൊരുക്കാന് സഹായകമായ ആകാശപാതയുടെ നിര്മ്മാണത്തെയും സാരമായി ബാധിച്ചു. കാരണം രാഷ്ട്രീയം തന്നെ. പിന്നീട് ഇപ്പോഴാണ് പദ്ധതിക്ക് അനക്കമുണ്ടായത്.
ഇപ്പോഴത്തെ സ്ഥിതി അനുസരിച്ച് രണ്ട് പദ്ധതികളായിട്ടാണ് നിര്മ്മാണം നടക്കുന്നത്. റോഡില് നിന്ന് 6.75 ഉയരത്തില് പ്ലാറ്റ്ഫോം നിര്മ്മിക്കുന്നതാണ് ഒരു പദ്ധതി. ലിഫ്റ്റ് സ്ഥാപിക്കുക എന്നതാണ് രണ്ടാമത്തെ പദ്ധതി. ഇതിനായി സ്ഥലം വിട്ടുകിട്ടാന് വലിയ ബുദ്ധിമുട്ടാണ് അനുഭവപ്പെട്ടത്. പോസ്റ്റോഫീസ്, വൈഎംസിഎ, സിഎംഐ തുടങ്ങിയ സ്ഥാപനങ്ങളെ കേന്ദ്രീകരിച്ച് ആവശ്യമായ നാലു ലിഫ്റ്റുകള്ക്കുള്ള അനുമതി ലഭ്യമായിട്ടുണ്ട്. ഫൗണ്ടേഷന്റെ നിര്മ്മാണ പ്രവര്ത്തനങ്ങള് ഇഴഞ്ഞാണ് നീങ്ങുന്നത്. ഉള്ളില് ഏഴ് കോളവും പുറത്ത് ഏഴുകോളവുമായാണ് ഫൗണ്ടേഷന് പണി നടക്കുന്നത്.
റോഡ് സുരക്ഷാ ഫണ്ടുകള് അടക്കം ആവശ്യമായ തുക യഥാസമയത്ത് അനുവദിച്ചിട്ടും ഇതുവരെ ആകാശപാതയുടെ നിര്മ്മാണ പ്രവര്ത്തനങ്ങള് പൂര്ത്തിയാക്കാത്തത് സര്ക്കാരിന്റെ അനാസ്ഥയാണെന്ന് നഗരസഭാ അദ്ധ്യക്ഷ പി.ആര്.സോന കുറ്റപ്പെടുത്തി. ആകാശപാത നിര്മ്മാണം വഴിമുട്ടിയതോടെ നഗരത്തിലെ ഗതാഗതക്കുരുക്ക് രൂക്ഷമാവുകയാണ്.
