തിരുവനന്തപുരം: നഗരസഭയുടെ രണ്ടാംവാര്ഷികത്തോടനുബന്ധിച്ച് വിവാഹങ്ങള് രജിസ്റ്റര് ചെയ്യാനുള്ള ഓണ്ലൈന് കിയോസ്കുകളുടെ ഉദ്ഘാടനം 7 ന് നടക്കും. നഗരപരിധിയിലെ കല്യാണമണ്ഡപങ്ങള്, ആരാധനാലയങ്ങള്, നഗരസഭയുടെ ആശുപത്രി കിയോസ്ക് പരിപാലിക്കുന്ന കുടുംബശ്രീ യൂണിറ്റ് എന്നിവയുമായി ചേര്ന്നാണ് നഗരസഭ ഈ സൗകര്യം ഒരുക്കുന്നത്. നഗരസഭാ അതിര്ത്തിക്കുള്ളില് നടക്കുന്ന വിവാഹങ്ങള് അതതു ദിവസം തന്നെ രജിസ്റ്റര് ചെയ്ത് സര്ട്ടിഫിക്കറ്റ്ðനല്കുന്നതിനുള്ള സംവിധാനമാണ് ഒരുങ്ങുന്നത്. വിവാഹം നടക്കുന്ന സ്ഥാപനങ്ങള് ഇതിനായി നഗരസഭയുമായി കരാറില് ഏര്പ്പെടണം. കല്യാണമണ്ഡപങ്ങളും ആരാധനാലയങ്ങളും ഇതിനായി നഗരസഭയില് പ്രത്യേകം അപേക്ഷാഫോറം നല്കണം. വധൂവരന്മാര് വിവാഹം നടത്തുന്നതിന് മണ്ഡപം ബുക്ക് ചെയ്യുമ്പോള് തന്നെ വിവാഹം രജിസ്റ്റര് ചെയ്യുന്നതിനുള്ള അപേക്ഷയും ആവശ്യമായ രേഖകളും നിശ്ചിതഫീസും മണ്ഡപത്തിന് കൈമാറണം.
വിവാഹ ഓണ്ലൈന് രജിസ്ട്രേഷനുമായി ബന്ധപ്പെട്ട് മണ്ഡപങ്ങളുടെ രജിസ്ട്രേഷന് ആരംഭിച്ചിട്ടുണ്ടെന്നും ഈ സംവിധാനത്തില് പങ്കാളികളാകാന് താത്പര്യമുള്ള കല്യാണമണ്ഡപങ്ങള്, ആരാധനാലയങ്ങള് എന്നിവയുടെ ചുമതലക്കാര് നഗരസഭാ മെയിന് ഓഫീസില് പ്രവര്ത്തിക്കുന്ന വിവാഹ രജിസ്ട്രേഷന് വിഭാഗവുമായി ബന്ധപ്പെടേണ്ടതാണെന്ന് മേയര് അറിയിച്ചു.
