രക്ഷാപ്രവര്‍ത്തനം വൈകുന്നു; തീരത്ത് പ്രതിഷേധം വ്യാപകം

പേട്ട: കടല്‍ക്ഷോഭത്തില്‍പെട്ട് കാണാതായ മത്സ്യത്തൊഴിലാളികളെ രക്ഷിക്കാനുള്ള പ്രവര്‍ത്തനത്തില്‍ വീഴ്ചവന്നതിനെ തുടര്‍ന്ന് തീരദേശമേഖലയില്‍ പ്രതിഷേധം വ്യാപകം. പലയിടത്തും സ്ത്രീകള്‍ ഉള്‍പ്പെടെയുള്ളവര്‍ റോഡുകള്‍ ഉപരോധിച്ച് ഗതാഗതം തടസ്സപ്പെടുത്തി. മത്സ്യത്തൊഴിലാളികളെ കണ്ടെത്തുന്നതിന് സര്‍ക്കാരും അധികൃതരും വീഴ്ചവരുത്തുന്നുവെന്ന് ആരോപിച്ചായിരുന്നു പ്രതിഷേധം.

പോലീസെത്തി ഉപരോധക്കാരെ അനുരഞ്ജനത്തിലൂടെ പിന്തിരിപ്പിക്കാന്‍ ശ്രമിച്ചെങ്കിലും പരാജയപ്പെട്ടു. ഉപരോധം നിമിത്തം മണിക്കൂറുകളോളം വലിയതുറ, വേളി, വെട്ടുകാട് തുടങ്ങി തീരത്തുകൂടിയുളള ഗതാഗതം നിലച്ചു. ഇന്നലെ രാവിലെ 9.30 ഓടെയാണ് വേളിയില്‍ വിഎസ്എസ്‌സി റോഡില്‍ ഉപരോധം ആരംഭിച്ചത്. വേളി പാലം കടന്നുവരുന്ന വാഹനങ്ങളെ ഉപരോധക്കാര്‍ തടസ്സപ്പെടുത്തി. തുടര്‍ന്ന് മത്സ്യത്തൊഴിലാളികള്‍ സംഘടിച്ചെത്തി ബോട്ട് ക്ലബ്ബിലേക്കും ഇംഗ്ലീഷ് ഇന്ത്യന്‍ ക്ലേസ് വഴി ആള്‍സെയിന്‍സിലേക്കുമുളള വാഹനങ്ങളും തടഞ്ഞിട്ടു. വലിയതുറ പോലീസ് എത്തി കാണാതായ മത്സ്യത്തൊഴിലാളികള്‍ക്ക് വേണ്ടി തിരച്ചില്‍ നടക്കുകയാണെന്നും ഉപരോധം അവസാനിപ്പിക്കണമെന്നും ആവശ്യപ്പെട്ടെങ്കിലും ഉപരോധക്കാര്‍ ചെവിക്കൊണ്ടില്ല. തുടര്‍ന്ന് പോലീസിനു നേരെ മുദ്രാവാക്യങ്ങള്‍ മുഴക്കി പ്രശ്‌നം രൂക്ഷമാക്കി.

ജോസണ്‍ (55), ജറാള്‍ഡ് (50), അനില്‍ (42), ഔസേപ് (56) എന്നിവരെയാണ് കൊച്ചു വേളിയില്‍ നിന്നു കാണാതായത്. ജോസണും ജറാള്‍ഡും മത്സ്യബന്ധനത്തിന് ബുധനാഴ്ച വൈകിട്ട് കടലിലേക്ക് പോയതായിരുന്നു. പിറ്റേന്ന് ഇവര്‍ മടങ്ങിവരാതായതോടെ അന്വേഷിച്ചുപോയതായിരുന്നു അനിലും ഔസേപ്പും. ഇന്നലെ ഉച്ചയോടെ അനിലും ഔസേപ്പും കൊല്ലം അഴീക്കലില്‍ എത്തിയതായി വിവരം ലഭിച്ചുവെങ്കിലും മറ്റ് രണ്ടുപേരെ കുറിച്ച് വ്യക്തത വരുത്തണമെന്ന് ഉപരോധക്കാര്‍ ആവശ്യപ്പെട്ടു. ഉപരോധം ഉച്ചകഴിഞ്ഞും നീണ്ടു.

വലിയതുറയില്‍ മത്സ്യബന്ധനത്തിന് പോയ പതിനഞ്ചോളം പേരെ കാണാനില്ലെന്ന് ചൂണ്ടിക്കാട്ടിയായിരുന്നു ഉപരോധം. കറുപ്പായി റോഡ് സ്വദേശി ജോസ് (42), കുഴിവിളാകം സ്വദേശികളായ ജെറാള്‍ഡ് (63), ബൈജു (40), പോള്‍ (59), ഡെന്നി (57), ചെറിയതുറ സ്വദേശികളായ സ്റ്റീഫന്‍ തോമസ്, സേവ്യര്‍ (58), ഒഎല്‍ജി നഗര്‍ സ്വദേശി ഈപ്പച്ചന്‍ (63), ജോസ് ഫ്രെഡി, അല്‍ഫോണ്‍സ് (65), ആന്റണി (49), ജാര്‍ഡിഷന്‍ (31), പീറ്റര്‍ (61), ബിനു (45), സജൂണ്‍ (39) എന്നിവരെയാണ് കാണാതായത്. ഇതില്‍ പത്തുപേര്‍ വളളങ്ങളില്‍ മത്സ്യബന്ധനത്തിന് പോയവരാണ്. ഉച്ചയോടെ വലിയതുറ ഫെറോന വികാരി സൈറസ് കളത്തില്‍, തിരുവനന്തപുരം അതിരൂപത വികാരി ജനറല്‍ യൂജിന്‍ എച്ച്. പെരേര, കൗണ്‍സിലര്‍ ഷീബ പാട്രിക് എന്നിവര്‍ ഉപരോധ സ്ഥലത്തെത്തി. ചര്‍ച്ചയെത്തുടര്‍ന്ന് ഉപരോധക്കാര്‍ അയഞ്ഞു.

വെട്ടുകാട് പളളിക്ക് സമീപം കമ്പി കൊണ്ട് റോഡ് അടച്ചായിരുന്നു ഉപരോധം. സോളമന്‍ വര്‍ഗീസ് (46), ജെയിംസ് (42), എഡിസണ്‍ ലോപസ് (47), ഷിബു സേവ്യര്‍ (35), റോയി (36) എന്നിവരെയാണ് ഇവിടെ കാണാതായത്. ഉച്ചകഴിഞ്ഞും ഉപരോധം തുടര്‍ന്നു.