മട്ടന്നൂര്: കേരളവര്മ്മ പഴശ്ശിരാജയുടെ വീരാഹുതി ദിനാചരണം നവംബര് 30 ന് പഴശ്ശിയില് നടക്കും. മട്ടന്നൂര് നഗരസഭയും കേരള സാഹിത്യ അക്കാദമിയും ഫോക്ലോര് അക്കാദമിയും സംയുക്തമായാണ് പരിപാടികള് സംഘടിപ്പിക്കുന്നത്. പുഷ്പാര്ച്ചന, ചരിത്ര സെമിനാര്, സാംസ്കാരിക ഘോഷയാത്ര ,സാംസ്കാരിക സമ്മേളനം, കലാസന്ധ്യ എന്നിവയുണ്ടാകും. രാവിലെ 8.30 ന് പഴശ്ശി സ്മൃതി മന്ദിരത്തില് ജനപ്രതിനിധികളും വിദ്യാര്ത്ഥികളും സാംസ്കാരിക പ്രവര്ത്തകരും പുഷ്പാര്ച്ചന നടത്തും. 9.30ന് പഴശ്ശി കോവിലകത്ത് ചരിത്ര സെമിനാര് കേരള സാഹിത്യ അക്കാദമി സെക്രട്ടറി ഡോ.കെ.പി.മോഹനന് ഉദ്ഘാടനം ചെയ്യും. നഗരസഭാ ചെയര്പേഴ്സണ് അനിതാ വേണു അധ്യക്ഷത വഹിക്കും. പഴശ്ശിയുടെ സാമ്രാജ്യത്വ വിരുദ്ധ പോരാട്ടങ്ങള് എന്ന വിഷയത്തില് ഡോ.എം.ആര്.രാഘവവാരിയര് സംസാരിക്കും. നാരായണന് കാവുമ്പായി മോഡറേറ്ററാകും. 11.30 ന് പഴശ്ശി പോരാട്ടം തലശ്ശേരി രേഖ, ഭാഷാപരമായ സവിശേഷതകള് എന്ന വിഷയം ഡോ ജോസഫ് സ്കറിയ അവതരിപ്പിക്കും. കൃഷ്ണകുമാര് കണ്ണോത്ത് മോഡറേറ്ററാകും. ഉച്ചയ്ക്ക് 2 മണിക്ക് സാമ്രാജ്യത്വ പോരാട്ടത്തിന്റെ പുതിയ മുഖങ്ങള് എന്ന വിഷയം ഡോ.പി.ജെ.വിന്സെന്റ് അവതരിപ്പിക്കും. ഡോ.സി.പി.രാധാമണി മോഡറേറ്ററാകും.വൈകുന്നേരം 5 ന് സാംസ്കാരിക ഘോഷയാത്രയ്ക്ക് ശേഷം പഴശ്ശി സ്മൃതിമന്ദിരത്തിനു സമീപം സാംസ്കാരിക സമ്മേളനം മന്ത്രി രാമചന്ദ്രന് കടന്നപ്പള്ളി ഉദ്ഘാടനം ചെയ്യും .നഗരസഭാ വൈസ് ചെയര്മാന് പി.പുരുഷോത്തമന് അധ്യക്ഷത വഹിക്കും.
പ്രതികരിക്കാൻ ഇവിടെ എഴുതുക: