കോട്ടയം: കുറുപ്പന്തറ റെയില്വേ സ്റ്റേഷന് സമീപം നിയന്ത്രണം വിട്ട ടിപ്പര്ലോറി റെയില്വേ സിഗ്നല് ഗേറ്റ് ഇടിച്ച് തകര്ത്തു. ഇന്റര്ലോക്ക് സിഗ്നല് ഗേറ്റായതിനാല് സിഗ്നല് സംവിധാനം പൂര്ണ്ണമായും തകരാറിലായി. ഇതിനെ തുടര്ന്ന് കോട്ടയം – എറണാകുളം റൂട്ടില് ട്രെയിന് ഗതാഗതം താറുമാറായി.
ഇന്നലെ ഉച്ചയ്്ക്കാണ് സംഭവം. തകരാര് പരിഹരിക്കാന് ഒരു ദിവസമെടുക്കുമെന്നാണ് റെയില്വേ അധികൃതര് പറയുന്നത്. ട്രെയിന് കടന്ന് പോയതിന് ശേഷം ഗേറ്റ് ഉയര്ത്താന് തുടങ്ങുമ്പോഴാണ് ടിപ്പര് ലോറി ഇടിച്ച് കയറിയത്. അപകടമുണ്ടാക്കിയ ലോറിയുടെ ഡ്രൈവറെ റെയില്വേ സംരക്ഷണ സേന കസ്റ്റഡിയിലെടുത്തിട്ടുണ്ട്. ഓട്ടോമാറ്റിക് സംവിധാനത്തോടെ പ്രവര്ത്തിക്കുന്ന ഗേറ്റ് അടഞ്ഞ് കിടക്കുന്നതിനാല് ചുവന്ന സിഗ്നലാണ് ട്രെയിനുകള്ക്ക് ലഭിക്കുന്നത്. ഇത് മൂലം ട്രെയിനുകള് പല സ്ഥലങ്ങളിലും നിര്ത്തിയിട്ടു.
യാത്രയ്ക്ക് തടസ്സമില്ലെന്ന് രേഖാ മൂലം അറിയിപ്പ് കൊടുത്താണ് ട്രെയിനുകള് കടത്തിവിടുന്നതെന്ന് റെയില്വേ ഉദ്യോഗസ്ഥര് പറഞ്ഞു. ദീര്ഘദൂര ട്രെയിനുകള് ഉള്പ്പെടെ ഒരു മണിക്കൂറോളം വൈകിയാണ് ഓടുന്നത്. വിവിധ സ്റ്റേഷനുകളില് പിടിച്ചിട്ട ജയന്തി ജനത, കോര്ബ എക്സ്പ്രസ്, ഹൈദ്രബാദ്, കേരള എക്സ്പ്രസുകള് വളരെ വൈകിയാണ് യാത്ര പുറപ്പെട്ടത്.
