കൊച്ചി : കോടതിയലക്ഷ്യക്കേസില് ഹാജരാകാതിരുന്ന കേരള വാട്ടര് അതോറിറ്റി എംഡി ഷൈനമോള് ഹൈക്കോടതിയില് നേരിട്ട് ഹാജരായി മാപ്പപേക്ഷ സമര്പ്പിച്ചു. തുടര്ന്ന് ഷൈനമോള്ക്കെതിരായ കോടതിയലക്ഷ്യ നടപടികള് അവസാനിപ്പിച്ചു. നവംബര് 15ന് രാവിലെ 10.15 ന് ഷൈനമോളെ അറസ്റ്റ് ചെയ്ത് ഹാജരാക്കാന് ഹൈക്കോടതി ഉത്തരവിട്ടിരുന്നു.
ജനറം ജലവിതരണ പദ്ധതിയുടെ കരാറുകാരായിരുന്ന ചെന്നൈയിലെ എന്ജിനീയറിംഗ് പ്രൊജക്ട്സ് ഇന്ത്യ ലിമിറ്റഡിന് ചേംബര് ചെലവ് പുതുക്കി നിശ്ചയിച്ചു നല്കാന് ഹൈക്കോടതി നേരത്തെ ഉത്തരവിട്ടിരുന്നു. ഇത് പാലിച്ചില്ലെന്ന് കാട്ടി കമ്പനിയുടെ സീനിയര് മാനേജര് ശ്രീനേഷ് നല്കിയ കോടതിയലക്ഷ്യ ഹര്ജിയിലാണ് ഡിവിഷന് ബെഞ്ചിന്റെ ഉത്തരവ്. ഹര്ജി കഴിഞ്ഞ ദിവസം പരിഗണിച്ചപ്പോള് നവംബര് 13 ന് ഷൈനമോള് നേരിട്ട് ഹാജരാകാനാണ് നിര്ദേശിച്ചത്.
എന്നാല് ഇതു ഭേദഗതി ചെയ്യണമെന്ന ആവശ്യം കണക്കിലെടുത്ത് വീണ്ടും ഹാജരാകാന് കോടതി നിര്ദേശിച്ചിരുന്നു. പക്ഷേ പിന്നീട് കേസ് പരിഗണിച്ചപ്പോഴും എംഡി ഹാജരായില്ല. കോടതി നിര്ദേശിച്ചിട്ടും ഹാജരാകാതിരുന്നത് നീതീകരിക്കാനാവില്ല. എംഡി ഷൈനമോളെ അറസ്റ്റ് ചെയ്ത് ഹാജരാക്കാന് ഉത്തരവിടുകയല്ലാതെ കോടതിക്ക് മറ്റു വഴിയില്ലെന്നും ഉത്തരവില് വ്യക്തമാക്കിയിരുന്നു.
