ഇരിട്ടി: മലബാര് ദേവസ്വത്തിന് കീഴിലുള്ള ഉളിക്കല് വയത്തൂര് കാലിയാര് ക്ഷേത്രത്തിലെ ജീവനക്കാര് ശമ്പളക്കുടിശ്ശിക ലഭിക്കാനായി കോടതി കയറാന് ഒരുങ്ങുന്നു. ഇവിടുത്തെ 11 ജീവനക്കാര്ക്കായി ലഭിക്കാനുള്ള 57 മാസത്തെ ശമ്പളക്കുടിശ്ശിഖയായ അമ്പതു ലക്ഷത്തിലേറെ രൂപ അനുവദിച്ചു കിട്ടുന്നതിനായാണ് നിയമ പോരാട്ടത്തിനൊരുങ്ങുന്നതെന്ന് ക്ഷേത്രം ജീവനക്കാരനായ കെ. മോഹന്ദാസ് പത്രസമ്മേളനത്തില് അറിയിച്ചു.
കല്ല്യാട്ട് താഴത്ത് കുടുംബക്കാരുടെ വകയായിരുന്നു ക്ഷേത്രം 1978 ല് ആണ് ദേവസ്വം ഏറ്റെടുക്കുന്നത്. 10 ലക്ഷത്തില് കൂടുതല് വരുമാനമുള്ള ക്ഷേത്രളിലെ ജീവനക്കാര്ക്ക് ക്ഷേത്രം തന്നെ ശമ്പളം നല്കണമെന്നായിരുന്നു കണക്ക്. 2015 ല് ഇത് 15 ലക്ഷമാക്കി ഉയര്ത്തി. മറ്റു ക്ഷേത്രങ്ങളില് നിന്നും വിഭിന്നമായി ആചാരപ്പെരുമകള് ഉള്ള ഊട്ടുത്സവം നടക്കുന്ന ക്ഷേത്രത്തില് ഭാരിച്ച ചിലവാണ് ഉത്സവത്തിനായി വരുന്നത്. അതുകൊണ്ടുതന്നെ വരുമാനത്തിന്റെ വലിയൊരുഭാഗം ഉത്സവാവശ്യങ്ങള്ക്കായി ചിലവാക്കിക്കഴിയുമ്പോള് ബാക്കി വരുന്നത് തുച്ഛമായ തുകയായിരിക്കും. ഇതില് നിന്നും ജീവനക്കാര്ക്ക് ശമ്പളം നല്കുക ദുഷ്കരമാണ്. നിരവധി തവണ ദേവസ്വം കമ്മീഷണറെയും, മുഖ്യമന്ത്രി, വകുപ്പ് മന്ത്രി എന്നിവരേയും കണ്ട് നിവേദനം നല്കിയെങ്കിലും കുടിശ്ശിഖയുടെ കാര്യത്തില് യാതൊരു വിധ തീരുമാനവും ഇതുവരെ കൈക്കൊള്ളാന് അധികൃതര്ക്കായിട്ടില്ല. ഇപ്പോള് കുടിശ്ശികയായി ലഭിക്കാനുള്ള 57 മാസത്തെ അമ്പതു ലക്ഷത്തിലേറെ രൂപ അനുവദിച്ചു കിട്ടുന്നതിനായി തങ്ങള് നിയമനടപടിക്ക് ഒരുങ്ങുകയാണെന്ന് ക്ഷേത്രം ജീവനക്കാരന് മോഹന്ദാസ് പത്രസമ്മേളനത്തില് അറിയിച്ചു.
