കണ്ണൂര്: സാധാരണക്കാരന്റെയും പാവപ്പെട്ടവന്റെയും പാര്ട്ടിയെന്ന് അവകാശപ്പെട്ടിരുന്ന സിപിഎമ്മിന്റെ മൂലധനശക്തിയായി മന്ത്രി തോമസ്ചാണ്ടി മാറിക്കഴിഞ്ഞുവെന്ന് ബിജെപി സംസ്ഥാന സെക്രട്ടറി ബി.ഗോപാലകൃഷ്ണന് പറഞ്ഞു. കണ്ണൂരില് ബിജെപിയുടെ ജില്ലാ കമ്മറ്റിയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. സ്വര്ണ്ണക്കള്ളക്കടത്തുകാര്, കായല് കയ്യേറ്റക്കാര്, ബൂര്ഷ്വാസികള് എന്നിവരാണ് ഇന്ന് സിപിഎമ്മിന് കൂട്ട്. ഇവരാണ് പാര്ട്ടിയെ നയിക്കുന്നത്.
ലോകം മുഴുവന് കമ്മ്യൂണിസം ശ്മശാനത്തില് അടക്കം ചെയ്യപ്പെട്ടു കഴിഞ്ഞു. കമ്മ്യൂണിസ്റ്റ് അടിവേരുകള് തകര്ക്കണം. സംഘര്ഷത്തിലൂടെ അത് സാധ്യമല്ല. ആശയ പ്രചാരണത്തിലൂടെയായിരിക്കണം അതെന്നും അദ്ദേഹം പറഞ്ഞു. സരിത വിഷയത്തില് ആദ്യംതൊട്ടേ പരാതി നിലവിലുണ്ടായിരുന്നു. എന്നാല് എഫ്ഐആറിടാനോ മറ്റെന്തെങ്കിലും നടപടിയെടുക്കാനോ എല്ഡിഎഫ് സര്ക്കാര് തയ്യാറായില്ല. ഇടത്-വലത് ഒത്തുതീര്പ്പ് രാഷ്ട്രീയമാണ് ഇത് കാണിക്കുന്നത്. നിയമസസഭ വിളിച്ചുചേര്ത്ത് സോളാര് റിപ്പോര്ട്ട് പുറത്തുവിട്ട സംഭവം വെറും നാടകം മാത്രമാണ്. രണ്ട് മുന്നണികളും ചേര്ന്ന് കേരളത്തെ ചണ്ടിയാക്കി മാറ്റിയിരിക്കുകയാണ്.
ബിജെപിക്കെതിരെ കള്ളപ്രചാരണം നടത്തുകയാണ്. നോട്ടുനിരോധനം വളരെ ആലോചിച്ചെടുത്ത തീരുമാനമാണെന്ന് സര്വ്വേകള് പോലും വ്യക്തമാക്കിക്കഴിഞ്ഞു. സിപിഎം കമ്മ്യൂണിസ്റ്റ് പാര്ട്ടി ഓഫ് മുസ്ലീം ആയി മാറിക്കഴിഞ്ഞു. മുസ്ലീങ്ങള്ക്കിടയിലെ തീവ്രവാദികളെ പ്രീണിപ്പിക്കുകയും ഹിന്ദുക്കളെ കൂടെ നിര്ത്തുകയും ചെയ്യുന്ന കാപട്യമാണ് പാര്ട്ടി തുടരുന്നതെന്നും അദ്ദേഹം പറഞ്ഞു.
യോഗത്തില് ജില്ലാ പ്രസിഡണ്ട് പി.സത്യപ്രകാശ് അധ്യക്ഷത വഹിച്ചു. ബിജെപി സംസ്ഥാന ജനറല് സെക്രട്ടറി എം.ടി.രമേഷ്, സെല് കോര്ഡിനേറ്റര് കെ.രഞ്ചിത്ത്, മേഖലാ സംഘടനാ സെക്രട്ടറി കോവൈ സുരേഷ്, വൈസ് പ്രസിഡണ്ട് എ.പി.ഗംഗാധരന്, ജില്ലാ ജനറല് സെക്രട്ടറിമാരായ കെ.കെ.വിനോദ് കുമാര്, അഡ്വ.വി.രത്നാകരന്, വൈസ് പ്രസിഡണ്ട് കെ.രാധാകൃഷ്ണന്, സെക്രട്ടറി എന്.ഹരിദാസ് തുടങ്ങിയവര് സംബന്ധിച്ചു.
