ശാസ്ത്രീയ നാമം: Aristo-lochia indica
സംസ്‌കൃതം: ഈശ്വരമുല്ല, ഗരുഡക്കൊടി
തമിഴ്: പാമ്പ് കരളകം, ഈശ്വരമുല്ല
എവിടെകാണാം: ഇന്ത്യയിലെവിടേയും കാണാം. വിഷ ചികിത്സയ്‌ക്കായാണ് ഈ വള്ളിച്ചെടി പ്രധാനമായും ഉപയോഗിക്കുന്നത്. ഗരുഡക്കൊടി, കരളകം എന്നീ പേരുകളിലും അറിയപ്പെടുന്നു. പാമ്പിന് ശത്രു ഗരുഡനെന്നപോലെയാണ് പാമ്പ് വിഷത്തിന് ഗരുഡക്കൊടി.
പ്രത്യുത്പാദനം: വിത്തില്‍ നിന്ന് പ്രത്യുത്പാദിപ്പിക്കാം.
ഔഷധപ്രയോഗങ്ങള്‍: ഗരുഡക്കൊടിയുടെ ഏഴ് ഇല വീതം രാവിലെ കഴിച്ചാല്‍ പാമ്പ് കടിയേറ്റാല്‍ വിഷം ഏല്‍ക്കില്ല എന്ന് വൃദ്ധ വൈദ്യന്മാര്‍ പറയാറുണ്ട്. ലേഖകന്‍ ഇത് പരീക്ഷിച്ചുനോക്കിയിട്ടില്ല.
ഗരുഡക്കൊടിയുടെ വേര് ചുക്ക്, കുരുമുളക്, തിപ്പലി എന്നിവ ചേര്‍ത്ത് പാമ്പുകടിയേറ്റയാള്‍ വെറ്റില കടിച്ചുചവയ്‌ക്കുന്നതുപോലെ ചവച്ച ശേഷം ആ വ്യക്തിയുടെ നെറുകയിലും ചെവികളിലും ഊതിയാല്‍ വിഷമേറ്റയാള്‍ക്ക് വേദന കുറയുന്നതിനും വിഷത്തിന്റെ വ്യാപനം തടയുന്നതിനും നല്ലതാണ്.
ഈശ്വരമുല്ലയുടെ ഇലയിടിച്ചുപിഴിഞ്ഞ നീര് 50 മില്ലി, കുരുമുളക് 10 ഗ്രാം ഇത്രയും വീതം ഓരോ ഇരുപത് മിനിട്ടും ഇടവിട്ട് പാമ്പ് കടിയേറ്റയാളെ(ദുഷ്ടകന്‍) കുടിപ്പിച്ചുകൊണ്ടിരുന്നാല്‍ ഏത് പാമ്പിന്റേയും വിഷം ശമിക്കും.
പുരുഷന്മാരുടെ ശീഘ്രസ്ഖലനവും സ്വപ്‌നസ്ഖലനും മാറുന്നതിന് ഗരുഡക്കൊടിയുടെ വേര് ചരടുപോലെ അരയില്‍ കെട്ടുകയും നാഭിയില്‍ ഇലവച്ച് കെട്ടുകയും ചെയ്യുക.
കരളകത്തിന്റെ ഇല ചതച്ച നീര് ഈരണ്ട് തുള്ളി വീതം രണ്ട് മൂക്കിലും ഒഴിച്ച് വായിലേക്ക് വലിച്ചിറക്കിയാല്‍ (നസ്യം ചെയ്യുക) മൂക്കടപ്പും ജലദോഷവും ശമിക്കും. പൊടിയേറ്റുള്ള തുമ്മല്‍ മാറുന്നതിനും ഇതേ മാര്‍ഗ്ഗം സ്വീകരിക്കുക.
ഗരുഡക്കൊടിയുടെ വേര് (അഞ്ച് ഗ്രാം) ചതച്ച് ഒരു രാത്രി മുഴുവന്‍ കരിക്കിന്‍ വെള്ളത്തില്‍(100 മില്ലി) ഇട്ടുവയ്‌ക്കുക. പിറ്റേന്ന് ഇത് കഴിക്കുക. വര്‍ഷകാലത്തെ പകര്‍ച്ചപ്പനി മാറുന്നതിനും പനി വരാതിരിക്കുന്നതിനും പ്രതിരോധശേഷി വര്‍ധിക്കുന്നതിനും നല്ലതാണ്.
ഗരുഡക്കൊടിയുടെ ഇല അരച്ച് നാഭിയില്‍ പുരട്ടിയാല്‍ സ്ത്രീകള്‍ക്കുണ്ടാകുന്ന ബീജദോഷം മാറും. വന്ധ്യതയ്‌ക്ക് കാരണമാകുന്ന ഈ അവസ്ഥ പരിഹരിക്കാന്‍ ഗരുഡക്കൊടിക്ക് സാധിക്കും. ഇലയുടെ പ്രഭാവഗുണമാണ് ഇതിന് കാരണം. ഒരു ഔഷധത്തിന്റെ സാന്നിധ്യം കൊണ്ട് രോഗശാന്തി വരുത്തുവാനുള്ള മരുന്നിന്റെ കഴിവാണ് പ്രഭാവഗുണം എന്നറിയപ്പെടുന്നത്.
ഗരുഡക്കൊടി അരച്ച് പാലില്‍ കുടിച്ചാല്‍ വിഷത്തിന്റെ വ്യാപനം തടയാം. ചര്‍മ്മരോഗം, പ്രത്യേകിച്ച് വെളളപ്പാണ്ട് മാറ്റുന്നതിനുള്ള തൈലം ഉണ്ടാക്കാന്‍ ഇതാവശ്യമാണ്.
ഗരുഡക്കൊടിയിലയുടെ 50 മില്ലി നീരില്‍ കുരുമുളക്, തിപ്പലി, ഏലത്തരി എന്നിവ പൊടിച്ചുചേര്‍ത്ത് കഴിച്ചാല്‍ ഛര്‍ദ്ദി, അതിസാരം എന്നിവയ്‌ക്ക് ശമനം കിട്ടും.
