കുന്നത്തൂര്: പുതിയ വാഹനങ്ങള് വാങ്ങുമ്പോള് ഡീലര്മാര് അവരുമായി ബന്ധപ്പെട്ട ഇന്ഷുറന്സ് കമ്പിനിയുടെ ഇന്ഷുറന്സ് എടുത്താല് മാത്രമെ വാഹനം നല്കുന്നുള്ളൂ എന്ന ഉപഭോക്താക്കളുടെ പരാതിയുടെ അടിസ്ഥാനത്തില് മോട്ടോര് വാഹന വകുപ്പ് നടപടി തുടങ്ങി.
കുന്നത്തൂര് അസി. മോട്ടോര് വെഹിക്കിള്സ് ഇന്സ്പെക്ടര് മുഹമ്മദ് സുജീര് ഈ വിഷയം ട്രാന്സ്പോര്ട്ട് കമ്മീഷണറുടെ ശ്രദ്ധയില്പ്പെടുത്തിയിരുന്നു. ഷോറൂമുകള് പരിശോധിച്ച് ഉപഭോക്താവിന് ഇഷ്ടമുള്ള വാഹന ഇന്ഷുറന്സ് എടുക്കാവുന്നതാണ് എന്ന ബോര്ഡുകള് പ്രദര്ശിപ്പിക്കാന് ഡീലര്മാര്ക്ക് നിര്ദേശം നല്കാനും ട്രാന്സ്പോര്ട്ട് കമ്മീഷണര് ഉത്തരവിട്ടു. ഇതിന്റെ ഭാഗമായി കുന്നത്തൂര് സബ്.ആര്ടി ഓഫീസിന്റെ ആഭിമുഖ്യത്തില് ഇന്നലെ വാഹന ഷോറൂമുകളില് പരിശോധന നടന്നു. ഭരണിക്കാവിലെ ഒരു പ്രമുഖ കാര് ഷോറൂമില് നടന്ന പരിശോധനയില് നിരവധി ക്രമക്കേടുകള് കണ്ടെത്തി.
ഒരേ ട്രേഡ് സര്ട്ടിഫിക്കറ്റ് രണ്ട് വാഹനങ്ങള്ക്ക് ഉപയോഗിച്ച് ക്രമക്കേട് നടത്തുന്നതായി കണ്ടെത്തി. അതിന്റെ ബന്ധപ്പെട്ട അസല് രേഖകള് ഹാജരാക്കാനും ഷോറും ജീവനക്കാര്ക്ക് സാധിച്ചില്ല. കൊല്ലം ആര്ടിഒയുടെ നിര്ദേശത്തെ തുടര്ന്ന് നടന്ന പരിശോധനയില് കുന്നത്തൂര് മോട്ടോര് വാഹന വകുപ്പ് ഉദ്യോഗസ്ഥരായ മുഹമ്മദ് സുജീര്, രാംജി.കെ കരന്, ധനീഷ് കുമാര് എന്നിവര് പങ്കെടുത്തു. നിയമം ലംഘിക്കുന്ന ഡീലര്മാര്ക്കെതിരെ നടപടി തുടരുമെന്നും, ക്രമക്കേടുകള് കണ്ടെത്തിയാല് ശക്തമായ നടപടിക്ക് ശുപാര്ശ ചെയ്യുമെന്നും ജോ. ആര്ടിഒ എച്ച്.അന്സാരി അറിയിച്ചു.
