തലശ്ശേരി: ആവശ്യത്തിന് സ്ഥലം ഏറ്റെടുക്കാനാവുന്നില്ലെങ്കില് ഒരു കാലത്തും നാട്ടിലേക്ക് വികസനം കടന്നുവരില്ലെന്ന് പ്രൊ. റിച്ചാര്ഡ് ഹേ എംപി ഓര്മ്മിപ്പിച്ചു. തലശ്ശേരി ജനറല് ആശുപത്രിയുടെ വികസന കാര്യത്തിലും സ്ഥലമാണ് പ്രശ്നമെന്ന് അദ്ദേഹം ചൂണ്ടിക്കാട്ടി. തന്റെ എംപി ഫണ്ടില് നിന്നുള്ള ഒരു കോടി രൂപ വിനിയോഗിച്ച് തലശ്ശേരി ജനറല് ആശുപത്രിയില് സജ്ജീകരിച്ച യൂറോളജി തീയ്യറ്ററിന്റെ ഔപചാരിക ഉത്ഘാടനം നിര്വ്വഹിച്ച് സംസാരിക്കവേ അദ്ദേഹം.
രാജ്യത്തെ എല്ലാ സംസ്ഥാനങ്ങളെയും പ്രതിനിധീകരിക്കുന്ന എംപിയാണെങ്കിലും തലശ്ശേരിയുടെ വികസനം എന്നും എന്റെ സ്വപ്നമായിരുന്നു. ജനപ്രതിനിധികള് ഒന്നിച്ചു നിന്നാല് കേന്ദ്ര സര്ക്കാരില് നിന്ന് പലതും നേടിയെടുക്കാനാവും. സ്ഥലം നല്കിയാല് തലശ്ശേരിക്കായി ഒന്നാംതരം മ്യൂസിയം, നല്ലലൈബ്രറി, പാര്ക്ക്, എന്നിവ നിര്മ്മിച്ചു തരാമെന്ന് വാഗ്ദാനമുണ്ട്. എന്നാല് സ്ഥലം കിട്ടാനില്ല. ദേശവാസികള് വിശാലമനസ്സോടെ സ്ഥലം വിട്ടുനല്കിയതിനാലാണ് മട്ടന്നൂര് മൂര്ഖന് പറമ്പില് വിമാനത്താവളം യാഥാര്ത്ഥ്യമായതെന്ന് എംപി ചൂണ്ടിക്കാട്ടി. അഡ്വ.എ.എന്.ഷംസീര് എംഎല്എ അദ്ധ്യക്ഷത വഹിച്ചു. നഗരസഭാ ചെയര്മാന് സി.കെ.രമേശന്, വൈസ് ചെയര്പേഴ്സണ് നജ്മാഹാഷിം,ടി.രാഘവന്, റുഫ്സീന, എം.പി.സുമേഷ്, എം.സി.പവിത്രന്, സി.പി.ഷൈജന്, എം.പി.അരവിന്ദാക്ഷന്, എ,പി.മഹമൂദ്, സി.എം.ബാലക്യഷ്ണന്, ആശുപത്രി സുപ്രണ്ട് ഡോ.പീയുഷ് നമ്പൂതിരി, ഡപ്യൂട്ടി സുപ്രണ്ട് ഡോ.വി.കെ..രാജീവന് തുടങ്ങിയവര് സംസാരിച്ചു.
