കട്ടപ്പന: ജാതി നോക്കാതെ എല്ലാ വിശ്വസികള്‍ക്കും ക്ഷേത്രപ്രവേശനം ഉറപ്പ് വരുത്തണം എന്ന് എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. മലനാട് യൂണിയനില്‍ നടന്ന പ്രവര്‍ത്തക ക്യാമ്പ് കട്ടപ്പനയില്‍ ഉദ്ഘാടനം ചെയ്തത് സംസാരിക്കുകയായിരുന്നു അദ്ദേഹം.
ഈ ആധുനിക കാലഘട്ടത്തിലും ജാതീയമായ വേര്‍തിരിവ് നിലനില്‍ക്കുകയാണ്. ഇതിനെതിരെയുള്ള ശക്തമായ സമരമുഖത്താണ് എസ്എന്‍ഡിപിയോഗം. യോഗത്തില്‍ യൂണിയന്‍ പ്രസിഡന്റ ബിജു മാധവന്‍ അദ്ധ്യക്ഷത വഹിച്ചു. എസ്.എന്‍ ട്രസ്റ്റ് ബോര്‍ഡ് അംഗം പ്രീതി നടേശന്‍ ഭദ്രദീപം തെളിച്ചു. പരിപാടിയില്‍ വെള്ളാപ്പള്ളി നടേശന്‍ ഭവന പദ്ധതി പ്രകാരം മുപ്പത്തിയെട്ട് ശാഖകളിലും ഭവനം നിര്‍മ്മിച്ച് നല്‍കും.
ആദ്യഘട്ടമെന്ന നിലയില്‍ യൂണിയനും, യൂത്ത് മൂവ്‌മെന്റും വെച്ചു നല്‍കുന്ന ഓരോ ഭവനങ്ങളുടെ പ്രഖ്യാപനം നടന്നു. യൂണിയന്‍ സെക്രട്ടറി വിനോദ് ഉത്തമന്‍, വൈസ് പ്രസിഡന്റ് വിധു എ. സോമന്‍, നേതാക്കളായ പി.ആര്‍. മുരളിധരന്‍, ഷാജി പുള്ളോലില്‍, പി. രാജന്‍, ചെമ്പന്‍കുളം ഗോപി വൈദ്യര്‍ തുടങ്ങിയവര്‍ സംസാരിച്ചു.
