കണ്ണൂര്: മാതൃഭാഷ ജനതയുടെ നിലനില്പ്പിന്റെ ആധാരമാണെന്നും അത് നിലനില്ക്കണമെങ്കില് ജീവിതത്തിന്റെ സമസ്ത മേഖലകളെയും ആവിഷ്കരിക്കാന് അതിന് കഴിയണമെന്നും മലയാളം സര്വ്വകലാശാല രജിസ്ട്രാര് ഡോ. കെ.എം.ഭരതന് പറഞ്ഞു. മലയാള ഭാഷാ വാരാചരണത്തിന്റെ ഭാഗമായി ‘മാതൃഭാഷയ്ക്ക് വേണ്ടിയുള്ള സമരങ്ങള്’ എന്ന വിഷയത്തില് വിവര പൊതുജനസമ്പര്ക്ക് വകുപ്പ് കണ്ണൂര് എസ്എന് കോളേജിലും കളക്ടറേറ്റ് കോണ്ഫറന്സ് ഹാളിലും സംഘടിപ്പിച്ച സെമിനാറുകളില് പ്രഭാഷണം നടത്തുകയായിരുന്നു അദ്ദേഹം.
മാതൃഭാഷ നാം സ്വപ്നം കാണുന്ന, ചിന്തിക്കുന്ന ഭാഷയാണ്. നമ്മുടെ സംസ്കാരത്തിന്റെ നാവാണത്. അത് ഭരണ നിര്വഹണത്തിന്റെയും കോടതി വ്യവഹാരത്തിന്റെയും പഠനത്തിന്റെയും ഭാഷയാവണം. ജനാധിപത്യ സമരങ്ങള് പൂര്ണതയിലെത്താന് ഭരണം ഭരിക്കപ്പെടുന്നവന്റെ ഭാഷയിലാവണം. മലയാള ഭാഷ ഒരു കാലത്ത് മൃതഭാഷയാവില്ലെന്ന് പറയാനാവില്ല. കാരണം മലയാള ഭാഷയിലെ അക്കങ്ങള് ആരും ഉപയോഗിക്കാതെ മരിച്ചു കഴിഞ്ഞ അനുഭവം നമുക്കുണ്ട്. ലോകത്ത് നൂറുകണക്കിന് ഭാഷകള് വംശഹത്യ ചെയ്യപ്പെടുകയാണ്. ആദിവാസികളെ പണിയ ഭാഷ പഠിപ്പിക്കാതെ മലയാളം പഠിപ്പിക്കുന്നു. അവരുടെ ഭാഷ ഒരിക്കലും അംഗീകരിക്കപ്പെടുന്നില്ല. അവരുടെ ഭാഷ ആവിഷ്കരിക്കാന് അവര്ക്ക് സാധിക്കുന്നില്ല. ആദിവാസികളെ മുഖ്യധാരയിലേക്ക് കൊണ്ടുവരാന് മലയാളം പഠിപ്പിക്കുമ്പോള് മുഖ്യധാരക്കാര് ഇംഗ്ലീഷാണ് പഠിക്കുന്നത്. ഏറ്റവും പരിഷ്കാരികളായി നാം കാണുന്ന ആളുകളുടെ ഭാഷയിലേക്ക് വരികയാണ് വേണ്ടത് എന്ന ധാരണ നാം ഉണ്ടാക്കിയിട്ടുണ്ട്.
കേരളത്തിന്റെ സാംസ്കാരികമായതും പാരിസ്ഥിതികവും ചരിത്രപരവും സാമൂഹികവുമായ അനുഭവങ്ങള് ഉള്ളത് മലയാളഭാഷയിലാണ്. ഇതൊരിക്കലും അന്യഭാഷകളില് കാണാന് കഴിയില്ല.
അതുവരെയുണ്ടായിരുന്ന മതപരവും ജാതീയവും പ്രാദേശികവുമായ സ്വത്വങ്ങളെ ഇല്ലാതാക്കിയിട്ടാണ് ഭാഷാപരമായ സ്വത്വത്തിന്റെ അടിസ്ഥാനത്തില് കേരളത്തിന് രൂപം കൊടുത്തത്. മാതൃഭാഷ ചെറിയ കാര്യമല്ല. നമ്മുടെ രാഷ്ട്രം ജനാധിപത്യപരമായി, മതനിരപേക്ഷമായി, ജാതിക്കതീതമായി, വൈവിധ്യങ്ങളെ പരസ്പരം പുണര്ന്നും പുലര്ന്നും നിലനില്ക്കുന്നതിന് അടിസ്ഥാനമായ ഏകകമാണ് ഭാഷ. ഓരോ സന്ദര്ഭത്തിനനുസരിച്ച് പറയാനുള്ള ശേഷി ഭാഷയ്ക്ക് ആര്ജിച്ചെടുക്കേണ്ടതുണ്ട്. കമ്പ്യൂട്ടര് സയന്സിലെ ബിറ്റ്സും ബൈറ്റ്സും എന്താണെന്ന് പറയാന് മലയാള ഭാഷയ്ക്ക് സാധിക്കണം. തമിഴിന് അത് സാധിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
എസ്.എന് കോളജില് മലയാള വിഭാഗവുമായി ചേര്ന്ന് സംഘടിപ്പിച്ച പരിപാടിയില് പ്രിന്സിപ്പല് ഡോ. ശിവദാസന് തിരുമംഗലത്ത് അധ്യക്ഷത വഹിച്ചു. ജില്ലാ ഇന്ഫര്മേഷന് ഓഫീസര് ഇ.കെ പത്മനാഭന്, മലയാള വിഭാഗം മേധാവി ഡോ. എം.പി ഷനോജ്, അധ്യാപകരായ പി.കെ ഷീബ, ഇ. ശ്രീലത എന്നിവര് സംസാരിച്ചു.
കളക്ടറേറ്റ് കോണ്ഫറന്സ് ഹാളില് ജില്ലാ ഭരണകൂടവുമായി ചേര്ന്ന് സംഘടിപ്പിച്ച പരിപാടിയില് എ.ഡി.എം ഇ. മുഹമ്മദ് യൂസഫ് അധ്യക്ഷത വഹിച്ചു. ജില്ലാ ഇന്ഫര്മേഷന് ഓഫീസര് ഇ.കെ പത്മനാഭന്, അസി.എഡിറ്റര് സി.പി അബ്ദുല് കരീം, എന്നിവര് സംസാരിച്ചു.
