മയാമി: ലോകകപ്പിലെ മൂന്നാം സ്ഥാനക്കാര്‍ക്കായുള്ള മത്സരത്തിന് വലിയ പ്രാധാന്യമില്ലെന്ന് വെളിവാക്കിക്കൊണ്ട് ടിക്കറ്റ് വില്‍പ്പന മന്ദഗതിയില്‍. ലൂസേഴ്‌സ് ഫൈനലില്‍ ഇംഗ്ലണ്ടും ഫ്രാന്‍സും തമ്മില്‍ മാറ്റുരയ്‌ക്കുന്ന മത്സരത്തിന് അയ്യായിരത്തിലധികം ടിക്കറ്റുകള്‍ ബാക്കി.
ഫിഫയുടെ ഔദ്യോഗിക ടിക്കറ്റ് സൈറ്റുകളില്‍ ഏകദേശം 7,000 ടിക്കറ്റുകള്‍ ഇനിയും വിറ്റുപോകാതെയുണ്ട്. ഇതില്‍ 1,246 ടിക്കറ്റുകള്‍ ജനറല്‍ സെയിലിലും, 5,864 ടിക്കറ്റുകള്‍ ഒഫീഷ്യല്‍ റീസെയില്‍ പ്ലാറ്റ്‌ഫോമിലുമാണുള്ളത്. ജനറല്‍ സെയിലിലുള്ള ടിക്കറ്റുകള്‍ക്ക് 865 മുതല്‍ 1,125 വരെയാണ് വില(ഇന്ത്യന്‍ റുപ്പി 83,266മുതല്‍ 1,08,293 രൂപ വരെ). റീസെയില്‍ പ്ലാറ്റ്‌ഫോമില്‍ ഏറ്റവും കുറഞ്ഞ കാറ്റഗറി 3 ടിക്കറ്റുകള്‍ക്ക് ഫിഫയുടെ 15% ബുക്കിംഗ് ഫീസ് കൂടാതെ 455 ഡോളര്‍ ആണ് നിശ്ചയിച്ചിരിക്കുന്നത്.(43,796 രൂപ).
ഉയര്‍ന്ന കാറ്റഗറിയിലുള്ള പല ടിക്കറ്റുകളും അവയുടെ യഥാര്‍ത്ഥ വാങ്ങല്‍ വിലയേക്കാള്‍ വളരെ കുറഞ്ഞ നിരക്കിലാണ് റീസെയില്‍ മാര്‍ക്കറ്റില്‍ ആരാധകര്‍ വില്‍ക്കാന്‍ വച്ചിരിക്കുന്നത്. ഞായറാഴ്ച നടക്കുന്ന ഫൈനല്‍ മത്സരത്തിന്റെ ടിക്കറ്റുകളും പൂര്‍ണ്ണമായി വിറ്റുതീര്‍ന്നിട്ടില്ല. ഫിഫയുടെ ജനറല്‍ സെയിലില്‍ ഏറ്റവും ഉയര്‍ന്ന നിരക്കിലുള്ള 32 സ്റ്റാന്‍ഡേര്‍ഡ് ടിക്കറ്റുകള്‍ ബാക്കിയുണ്ട്. എന്നാല്‍ ഇവയുടെ വില 29,995 ഡോളറിനും 32,970 ഡോളറിനും ഇടയിലാണ്. (ഇന്ത്യന്‍ റുപ്പി 28,87,165നും 31,73,463 നും ഇടയില്‍.) ഒഫീഷ്യല്‍ റീസെയില്‍ സൈറ്റില്‍ പല ടിക്കറ്റുകളും ഉയര്‍ന്ന ഫിഫ ഫീസോടുകൂടിയാണ് റീലിസ്റ്റ് ചെയ്തിരിക്കുന്നത്.
