മയാമി: ലോകകപ്പ് ഫൈനലിന്റെ ജയത്തിന് പൊന്നുംവിലയായി. ചരിത്രത്തിലാദ്യമായി, ഇത്തവണത്തെ ലോകകപ്പ് ജേതാക്കള്ക്ക് സ്വര്ണ്ണ മെഡലിനും ട്രോഫിക്കും പുറമെ ‘ചാമ്പ്യന്ഷിപ്പ് റിങ്ങുകളും’ സമ്മാനിക്കും. അമേരിക്കന് കായിക സംസ്കാരത്തിന്റെ ഭാഗമായ ഈ പുതിയ മാറ്റത്തിന് പുറമെ, ഞായറാഴ്ച നടക്കുന്ന കലാശപ്പോരാട്ടത്തില് യു.എസ്. പ്രസിഡന്റ് ഡൊണാള്ഡ് ട്രംപ് നേരിട്ട് പങ്കെടുക്കുമെന്നും സ്ഥിരീകരിച്ചിട്ടുണ്ട്.
എന്എഫ്എല്ലിലെ സൂപ്പര് ബോള് ജേതാക്കള്ക്കും എന്ബി.എ ചാമ്പ്യന്മാര്ക്കും റിങ്ങുകള് നല്കുന്ന അമേരിക്കന് കായിക പാരമ്പര്യമാണ് ഇത്തവണ ഫിഫ ലോകകപ്പിലും നടപ്പിലാക്കുന്നത്. ലോക ചാമ്പ്യന്മാരാകുന്ന ടീമിലെ അംഗങ്ങള്ക്കായി പ്രത്യേകം രൂപകല്പ്പന ചെയ്ത 30 ചാമ്പ്യന്ഷിപ്പ് റിങ്ങുകള് ഫിഫ നല്കും. ഓരോ മോതിരത്തിലും ലോകകപ്പ് ട്രോഫിയുടെ ചെറുരൂപവും ടീമിന്റെ പേരും കൊത്തിവെച്ചിട്ടുണ്ടാകും. കളി കാണാന് എത്തുന്ന ആരാധകര്ക്കായി ഈ പ്രത്യേക ഡിസൈനിലുള്ള 1,996 ലിമിറ്റഡ് എഡിഷന് മോതിരങ്ങള് ഫിഫ ഔദ്യോഗികമായി വില്പനയ്ക്കും വയ്ക്കുന്നുണ്ട്. യു.എസ്. വൈറ്റ് ഹൗസ് പ്രസ് സെക്രട്ടറി കാരിന് ജീന്പിയറി ഔദ്യോഗികമായി സ്ഥിരീകരിച്ചതുപ്രകാരം, പ്രസിഡന്റ് ഡൊണാള്ഡ് ട്രംപ് ഫൈനല് മത്സരം കാണാന് സ്റ്റേഡിയത്തില് എത്തും. ഫിഫ പ്രസിഡന്റ് ഗയാനി ഇന്ഫാന്റിനോയ്ക്കൊപ്പം ട്രംപ് വിജയികള്ക്കുള്ള ലോകകപ്പ് ട്രോഫി സംയുക്തമായി വേദിയില് സമ്മാനിക്കും. ഈ ലോകകപ്പില് യുഎസ്എ ടീമിന്റെ ഒരു മത്സരം പോലും കാണാതിരുന്ന ട്രംപ്, ഫൈനലിന് നേരിട്ടെത്തുന്നത് വലിയ വാര്ത്തയായിരിക്കുകയാണ്.
ലോകകപ്പിന് പങ്കെടുത്താല് പോലും പോക്കറ്റില് കോടിക്കിലുക്കം. ഇത്തവണത്തെ ലോകകപ്പില് വിജയികള്ക്ക് ലഭിക്കുന്നത് 51.5 മില്യണ് ഡോളറാണ്. അതായത് ഏകദേശം 499.55 കോടി രൂപ. റണ്ണേഴ്സ് അപ്പിന് കിട്ടുന്നത് 34.5 മില്യണ് (334.65 കോടി രൂപ) ആണ്. ഇതിന് പുറമെ, ലോകകപ്പിന് യോഗ്യത നേടിയ ഓരോ ടീമിനും 1.5 മില്യണ് (ഏകദേശം 12.9 കോടി) തയ്യാറെടുപ്പ് ചെലവിനായി ഫിഫ പ്രത്യേകം നല്കും.
2026 ലോകകപ്പിനായി ഫിഫ 655 മില്യണ് ഡോളര് പ്രകടനത്തെ അടിസ്ഥാനമാക്കിയുള്ള സമ്മാനത്തുകയും, തയ്യാറെടുപ്പ് ഗ്രാന്റുകളും മറ്റ് ആനുകൂല്യങ്ങളും ഉള്പ്പെടെ ആകെ 871 മില്യണ് ഡോളറിലധികം സാമ്പത്തിക വിതരണം പ്രഖ്യാപിച്ചിട്ടുണ്ട്.
