കണ്ണൂര്: എയിഡഡ് സ്കൂള് മാനേജര്മാരുടെ ഭരണഘടനാനുസൃതമായ അധികാരവകാശങ്ങള് കവര്ന്നെടുക്കുന്ന മാറിമാറിവരുന്ന സര്ക്കാര് സമീപനത്തില് പ്രതിഷേധിക്കുവാനും ഇതിനെതിരെ ഹൈക്കോടതിയെയും വേണ്ടിവന്നാല് സുപ്രീകോടതിയെയും സമീപിക്കുവാനും എയിഡഡ് സ്കൂള് മാനേജര്മാര് തീരുമാനിച്ചു.
ഏകപക്ഷീയയമായ കെഇആര് പരിഷ്കരണം ഭരണഘടനാ വിരുദ്ധവും മാനേജര്മാരെ സംബന്ധിച്ചിടത്തോളം അപ്രായോഗികവുമാണ്. കെഇ ആക്ട് ഭേദഗതിവരുത്തണമെങ്കില് ബന്ധപ്പെട്ട കക്ഷികളുമായി സമന്വയത്തില് എത്തിയതിനു ശേഷം മാത്രമേ നിയമസഭയില് അവതരിപ്പിച്ച് പാസാക്കി ഭരണഘടനയുടെ 9-ാം ഷെഡ്യൂളില്പ്പെടുത്തി ഇന്ത്യന് പ്രസിഡണ്ട് ഒപ്പുവെച്ചു കഴിഞ്ഞാല് മാത്രമേ നിയമസാധ്യത ഉള്ളൂ.
ഇതൊന്നുമില്ലാതെ കെഇആര് പരിഷ്കരണത്തിന്റെ പേരുപറഞ്ഞ് മാനേജര്മാരുടെ അധികാരാവകാശങ്ങള്ക്കു കൂച്ചുവിലങ്ങിടുന്ന സര്ക്കാര് സമീപനത്തില് പ്രതിഷേധിക്കുവാനും മാനേജര്മാരെ ബാധിക്കുന്ന മറ്റ് ഒട്ടനവധി ഓഡറുകളുടെ സാധ്യതയെ കോടതിയില് ചോദ്യം ചെയ്യുവാനും കേരളാ പ്രൈവറ്റ് (എയ്ഡഡ്) മാനേജേഴ്സ് അസോസിയേഷന് കണ്ണൂര് ജില്ലാ കമ്മറ്റി തീരുമാനിച്ചു.
ഈ കാര്യങ്ങള് ചര്ച്ച ചെയ്ത് ഭാവി പരിപാടികള്ക്കു രൂപം നല്കുന്നതിന് 4ന് എയിഡഡ് സ്കൂള് മാനേജര്മാരുടെ ജില്ലാ കണ്വെന്ഷന് രാവിലെ 10 മണിക്ക് കണ്ണൂര് ജിവഹര്ലൈബ്രറി ഹാളില്വെച്ച് ചേരും. യോഗത്തില് സംസ്ഥാന ലീഗല് അഡൈ്വസറി കമ്മറ്റി ചെയര്മാന് അഡ്വ. നന്ദകുമാറും സെക്രട്ടറി നാസര് എടരിക്കോറും പങ്കെടുക്കുമെന്നും ഭാരവാഹികള് അറിയിച്ചു. ഫോണ്: 9645774168.
