വളപട്ടണം: തീവ്രവാദികളോടുള്ള മൃദുസമീപനം തുടര്ന്നാല് സിപിഎം കനത്ത വില നല്കേണ്ടി വരുമെന്ന് ബിജെപി സംസ്ഥാന ജനറല് സെക്രട്ടറി കെ.സുരേന്ദ്രന് പറഞ്ഞു. ഐഎസ് ഭീകരവാദത്തിനെതിരെസംഘപരിവാര് സംഘടനകളുടെ ആഭിമുഖ്യത്തില് വളപട്ടണത്ത് നടന്ന പൊതുയോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
മുസ്ലീം സമുദായത്തിന്റെ വോട്ടുനേടുന്നതിനായി സിപിഎം നാടുനീളെ കള്ളക്കഥകള് പ്രചരിപ്പിക്കുകയാണ്. തീവ്രവാദ ശക്തികളോട് മൃദുസമീപനമാണ് സിപിഎം നേതൃത്വവും സംസ്ഥാന ഭരണകൂടവും കൈക്കൊള്ളുന്നത്. ഈ മൃദുസമീപനം തുടര്ന്നാലുണ്ടാകുന്ന പ്രത്യാഘാതങ്ങള്ക്ക് സിപിഎം കനത്ത വില നല്കേണ്ടിവരും. സിപിഎമ്മിന്റെ ശക്തികേന്ദ്രങ്ങളിലാണ് ഐഎസിന്റെ വേരുകള് ആഴ്ന്നിറങ്ങിയിരിക്കുന്നത്. രാജ്യത്താകമാനം ഐഎസ് ഭീകരവാദം ഊട്ടിയുറപ്പിക്കാനുള്ള തയ്യാറെടുപ്പിലാണ് എസ്ഡിപിഐയും മറ്റ് തീവ്രവാദ സംഘടനകളും ശ്രമിച്ചുകൊണ്ടിരിക്കുന്നത്.
സത്യസരണിയില് മതംമാറ്റം നടക്കുന്നുവെന്ന് പോപ്പുലര്ഫ്രണ്ടിന്റെ നേതാവ് തന്നെ വെളിപ്പെടുത്തിയിരിക്കുകയാണ്. സിപിഎം സംസ്ഥാന സെക്രട്ടറി കോടിയേരി ഐഎസിന് അനുകൂലമായി സംസാരിക്കുകയാണ്. ഉത്തരേന്ത്യയിലും മറ്റും നടന്ന നിസ്സാര സംഭവങ്ങളെ പര്വ്വതീകരിച്ച് മുസ്ലീം മതവിഭാഗങ്ങള്ക്കിടയില് പ്രത്യേക മാനസികാവസ്ഥയുണ്ടാക്കി ചേരിതിരിവ് സൃഷ്ടിക്കാന് സിപിഎം നേതൃത്വം ശ്രമിച്ചുകൊണ്ടിരിക്കുകയാണ്. ആര്എസ്എസും മുസ്സീംസമുദായവും തമ്മില് കേരളത്തില് ഒരിടത്തും ഏറ്റുമുട്ടലുകളോ കൊലപാതകങ്ങളോ ഉണ്ടായിട്ടില്ല. എന്നാല് അരിയില് ഷുക്കൂര്, ഫസല് തുടങ്ങി നിരവധി മുസ്ലീം യുവാക്കളെയാണ് സിപിഎം സംസ്ഥാനത്ത് വെട്ടിക്കൊലപ്പെടുത്തിയത്. ന്യൂനപക്ഷപ്രേമം നടിക്കുകയും മറുഭാഗത്ത് ഇവരെ കൊലപ്പെടുത്തുകയും ചെയ്യുന്ന നടപടിയാണ് സിപിഎം കാലങ്ങളായി തുടര്ന്നുവരുന്നത്. കനകമലയിലും വാഗമണിലും നടന്ന തീവ്രവാദ ക്യാമ്പുകള് കണ്ടെത്താനും പ്രതികളെ പിടികൂടാനും എന്ഐഎ സംഘം വരേണ്ടി വന്നു. സംസ്ഥാന ആഭ്യന്തര വകുപ്പ് ഇതൊന്നും കണ്ടില്ലെന്ന് നടിക്കുകയാണ്. സിപിഎമ്മിലെ മുസ്ലീം നേതാക്കള് മതപരമായ എല്ലാ ചടങ്ങുകളും നടത്തുകയും മതേതരത്വം പ്രസംഗിക്കുകയും ഹൈന്ദവാചാരങ്ങളെ വര്ഗ്ഗീയമായി ചിത്രീകരിക്കുകയുമാണ്. ഒരു നാണയത്തിന്റെ ഇരുവശങ്ങളെപ്പോലെയാണ് എസ്ഡിപിഐയും സിപിഎമ്മും പ്രവര്ത്തിക്കുന്നത്. നോട്ട് നിരോധനത്തിനെതിരെ ശക്തമായ എതിര്പ്പുമായി സിപിഎമ്മും എസ്ഡിപിഐയും മുന്നോട്ട് വരാന് കാരണം നോട്ട് നിരോധനം ഏറ്റവും കൂടുതല് ബാധിച്ചത് ഇരു സംഘടനകളെയുമാണ് എന്നതിനാലാണ്. കൊക്കൊക്കോളയും കോഴിയിറച്ചിയും കഴിച്ച് നായ നക്കിയ പോലെയാണ് ജനജാഗരണയാത്ര നടന്നതെന്നും യാത്ര നുണയാത്രയായി മാറിയെന്നും അദ്ദേഹം പറഞ്ഞു. വളപട്ടണത്ത് കാലുകുത്തിയാല് സുരേന്ദ്രനെ ഇല്ലാതാക്കുമെന്ന എസ്ഡിപിഐയുടെ പ്രഖ്യാപനം കണക്കിലെടുത്താണ് അടിയന്തിരമായി മറ്റ് പരിപാടികള് മാറ്റിവെച്ച് വളപട്ടണത്ത് സംസാരിക്കാന് തീരുമാനിച്ചതെന്നും അദ്ദേഹം പറഞ്ഞു.
ചടങ്ങില് കെ.ജി.ബാബു അധ്യക്ഷത വഹിച്ചു. ബിജെപി മണ്ഡലം പ്രസിഡണ്ട് കെ.എന്.വിനോദ് മാസ്റ്റര് സംബന്ധിച്ചു. എം.വി.ഉണ്ണികൃഷ്ണന് സ്വാഗതവും പി.വി.നികേഷ് നന്ദിയും പറഞ്ഞു.
