കുന്നത്തൂര്: കുട്ടികള്ക്ക് ഉപയോഗിയ്ക്കുന്ന ഡയപ്പറുകള് മാലിന്യങ്ങള്ക്കൊപ്പം പാതയോരങ്ങളില് തള്ളുന്നത് വ്യാപകമാകുന്നു. വീടുകളിലും ആശുപത്രികളിലും നിന്നുള്ള ഉപയോഗം കഴിഞ്ഞ ഡയപ്പറുകളാണ് ഇത്തരത്തില് പാതയോരങ്ങളില് ഉപേക്ഷിക്കുന്നത്.
പഞ്ഞി നിര്മിതമായതിനാല് വെള്ളം കയറുന്നതോടെ വീര്ത്ത് വലുതാകുന്നു. ഇവ നശിയ്ക്കാനും കാലതാമസം നേരിടും. സഞ്ചികളിലും, ചാക്കുകളിലുമാക്കിയാണ് വിസര്ജ്യമാലിന്യങ്ങള് കലര്ന്ന ഡയപ്പറുകള് ഉപേക്ഷിയ്ക്കുന്നത്. ഇവ മഴവെള്ളത്തിനൊപ്പം ജലാശയങ്ങളിലേക്ക് ഒലിച്ചിറങ്ങുന്നത് ജലമലിനീകരണത്തിനും കോളറ പോലുള്ള ജലജന്യ രോഗങ്ങള്ക്കും കാരണമാകുമെന്ന ആശങ്ക വളര്ന്നിട്ടുണ്ട്. തെരുവ്നായകള് ഇത് കടിച്ചുകീറി റോഡുകളിലും മറ്റും ഇടുകയും ചെയ്യുന്നു.
ഇത് യാത്രക്കാര്ക്കും ബുദ്ധിമുട്ട് സുഷ്ടിയ്ക്കുകയാണ്. ഡയപ്പര് മാലിന്യങ്ങള് കത്തിച്ച് കളയാനുള്ള പ്രായോഗികബുദ്ധിമുട്ട് കൊണ്ടാണ് ഇത്തരത്തില് ഉപേക്ഷിക്കുന്നത്. ഇതിന്റെ നിര്മ്മാര്ജ്ജനം എങ്ങനെ സാധ്യമാകും എന്നതിനെ കുറിച്ച് ആരോഗ്യവകുപ്പ് അധികൃതര് പൊതുജനങ്ങള്ക്ക് അവബോധം നല്കണമെന്ന് ആവശ്യം ശക്തമായി.
