തളിപ്പറമ്പ്: നിര്ദ്ദിഷ്ട ബൈപ്പാസിനെതിരെ കീഴാറ്റൂരില് നടക്കുന്ന സമരപരിപാടികള് സിപിഎമ്മിന് തലവേദനയാകുന്നു. ചുടല കുറ്റിക്കോല് ബൈപ്പാസിനെതിരെ കീഴാറ്റൂരിലെ ഇരുഭാഗത്തെയും ജനങ്ങള് കഴിഞ്ഞ ദിവസം പ്രതിഷേധ പരിപാടികളുമായി രംഗത്തെത്തിയതാണ് സിപിഎമ്മിന് തലവേദനയായി മാറുന്നത്. നേരത്തെ കീഴാറ്റൂര് വയലിലൂടെയുള്ള ബൈപ്പാസ് ഒഴിവാക്കണമെന്നാവശ്യപ്പെട്ട് വയല്കിളികള് സമരം ചെയ്തിരുന്നു.
പതിനേഴ് ദിവസം നീണ്ടുനിന്ന സമരം ഏറെ ശ്രദ്ധേയവും സിപിഎമ്മിന് കടുത്ത വെല്ലുവിളിയുമായി മാറിയിരുന്നു. ഇതേ തുടര്ന്ന് സിപിഎം ജില്ലാ നേതൃത്വത്തിന്റെ നിര്ദ്ദേശപ്രകാരം വകുപ്പ് മന്ത്രി ഇതുസംബന്ധിച്ച് യോഗം വിളിക്കുകയും ഇതിന്റെ അടിസ്ഥാനത്തില് പുതിയ അലൈന്റമെന്റ് പഠിക്കാന് വിദഗ്ധ സംഘം കീഴാറ്റൂരില് എത്തുകയും ചെയ്തിരുന്നു.
കീഴാറ്റൂര് വയലിന്റെ ഒരുഭാഗവും നേര് എതിര്വശമുള്ള കീഴാറ്റൂര് പ്ലാത്തോട്ടം വയലും കോളനിയും ക്ഷേത്രങ്ങളും വീടുകളും ഉള്പ്പെടുത്തിയുള്ള എലൈന്റമെന്റായിരുന്നു വിദഗ്ധസംഘം നിര്ദ്ദേശിച്ചത്. ഇതോടെ വയല്കിളികള്ക്കു പുറമെ കീഴാറ്റൂര് പ്ലാത്തോട്ടം നിവാസികളും സമര രംഗത്തേക്ക് ഇറങ്ങുകയായിരുന്നു.
രണ്ടുപ്രദേശക്കാരെയും പരസ്പരം തമ്മിലടിപ്പിക്കാനുള്ള നീക്കവും ചിലകേന്ദ്രങ്ങളില് നിന്നും ഉണ്ടായിരുന്നെങ്കിലും രണ്ടുപ്രദേശക്കരും കൈകോര്ത്താണ് കഴിഞ്ഞ ദിവസം പ്രതിഷേധ സമരം നടത്തിയത്. വയല്കിളികളുടെ ആഭിമുഖ്യത്തില് വയല് വരമ്പില് മനുഷ്യച്ചങ്ങല തീര്ത്തു. അക്കരെ ജനകീയ കൂട്ടായ്മ പ്രതിഷേധ ജ്വാലയാണ് സംഘടിപ്പിച്ചത്.
ഇരുപരിപാടികളിലും നൂറുകണക്കിന് സിപിഎം പ്രവര്ത്തകരാണ് പങ്കെടുത്തത്. വയല്കിളികള് മനുഷ്യച്ചങ്ങലക്ക് ശേഷം പ്രകടനമായി അക്കരെ ജനകീയ കൂട്ടായ്മ സംഘടിപ്പിച്ച പ്രതിഷേധ ജ്വാലയിലും പങ്കെടുത്തു. കീഴാറ്റൂര് പ്രശ്നം പരിഹരിക്കാന് കഴിയാത്തത് സിപിഎമ്മില് കടുത്ത പ്രതിസന്ധിക്ക് കാരണമായിട്ടുണ്ട്.
