പാനൂര്: പ്രവൃത്തിദിനത്തില് സ്കൂളിന് അവധി നല്കിയതില് പ്രതിഷേധം ശക്തം. യുവമോര്ച്ച സംസ്ഥാന ഉപാദ്ധ്യക്ഷന് കെ.ടി.ജയകൃഷ്ണന് മാസ്റ്ററെ ക്ലാസുമുറിയിലിട്ട് കുട്ടികളുടെ മുന്നില് വെച്ച് വെട്ടിക്കൊലപ്പെടുത്തിയ മൊകേരി ഈസ്റ്റ് യുപി സ്കൂളിലാണ് ചട്ടവിരുദ്ധമായി അവധി നല്കിയത്. ഐ.വി.ദാസ് അനുസ്മരണത്തിന് വേണ്ടിയാണ് അവധി നല്കിയതെന്നാണ് അധികൃതര് നല്കിയ വിശദീകരണം. ഇന്നലെ ഒരു മണിവരെ അദ്ധ്യയനം നടത്തുകയും പിന്നീട് ലീവ് അനുവദിക്കുകയുമായിരുന്നു. വിദ്യാഭ്യാസ കലണ്ടര് പ്രകാരം പ്രവൃത്തി ദിനമായ ഇന്നലെ വിദ്യാര്ത്ഥികളുടെ പഠനം മുടക്കി സ്കൂള് അധികൃതര് സിപിഎം പരിപാടിക്ക് വേദി അനുവദിച്ചു നല്കുകയായിരുന്നു. വിദ്യാഭ്യാസമന്ത്രിയുടെ പാര്ട്ടിക്കാര് തന്നെ പഠനം മുടക്കികളായി മാറി.
അനുസ്മരണ പരിപാടിയുടെ പ്രചാരണാര്ത്ഥം സിപിഎം നേതാക്കളുടെ ചിത്രങ്ങളും സ്കൂള് കോമ്പൗണ്ടിനുളളില് സ്ഥാപിച്ചിരുന്നു. പരിസരം മുഴുവന് പതാകയും തോരണവുമായി അലങ്കരിച്ചായിരുന്നു പരിപാടിയുടെ മുന്നൊരുക്കം. കോണ്ഗ്രസ് നിയന്ത്രണത്തിലുളള മാനേജ്മെന്റിന്റെ കീഴിലാണ് ഇപ്പോള് സ്കൂള്. സിപിഎം ശക്തികേന്ദ്രമായ ഈ പ്രദേശത്ത് മറ്റ് രാഷ്ട്രീയ പാര്ട്ടികള്ക്ക് പ്രവര്ത്തനസ്വാതന്ത്ര്യം അനുവദിച്ച് നല്കാറില്ല. സ്കൂള് അധികൃതരെ ഭീഷണിപ്പെടുത്തി കാര്യം സാധിക്കുകയാണ് പതിവ്. കെടി.ജയകൃഷ്ണന് മാസ്റ്ററുടെ കൊലപാതകത്തോടെ 55 വിദ്യാര്ത്ഥികള് മാത്രമായിരുന്നു ഇവിടെ ഉണ്ടായിരുന്നത്. പഠന നിലവാരം ഉയര്ത്താന് കെട്ടിടം നവീകരിച്ചും സ്കൂള് ബസുകള് ഇറക്കിയും മറ്റും പുതിയ മാനേജ്മെന്റ് പ്രവര്ത്തിച്ചതിന്റെ ഫലമായി അടച്ചുപൂട്ടല് ഭീഷണിയില് നിന്നും കരകയറി വരുന്ന സ്കൂളിനെ വീണ്ടും പഴയനിലയിലേക്ക് തളളിവിടാനാണ് സിപിഎം നീക്കം. ഇവിടുത്തെ ചില അദ്ധ്യാപകരുടെ ഇടപെടലും ഇതിനുപിന്നിലുണ്ട്. ഐ.വി.ദാസ് സ്കൂളിലെ പൂര്വ്വഅദ്ധ്യാപകനായതു കൊണ്ടാണ് പരിപാടിക്ക് സ്കൂള് വിട്ടു നല്കിയതെന്ന വിശദീകരണമാണ് പ്രധാനദ്ധ്യാപകന് പ്രദീപ്കുമാര് നല്കിയത്. കെടി.ജയകൃഷ്ണന് മാസ്റ്റര് വധത്തിലെ ഒന്നാംപ്രതി അച്ചാരംമ്പത്ത് പ്രദീപന് ഇവിടെ പിടിഎ പ്രസിഡണ്ടായിരുന്നു. നിലവില് പിടിഎ പ്രസിഡണ്ടായ കെ.പി.ശ്രീജിത്ത് സിപിഎം പ്രാദേശിക നേതാവാണ്. ഇയാളുടെ ഭാര്യയെ ഈ വര്ഷം മുതല് അദ്ധ്യാപികയായി ഇവിടെ നിയമിച്ചിട്ടുണ്ട്. സിപിഎമ്മിനൂ വേണ്ടി സ്കൂള് അധികൃതര് വഴിവിട്ട സഹായങ്ങളാണ് നല്കി വരുന്നത്. ലോകമനസാക്ഷിയെ ഞെട്ടിച്ച കൊലപാതകം നടത്തി സ്കൂളിനെ കുപ്രസിദ്ധമാക്കിയ സിപിഎം സംഘം വീണ്ടും അതേ സ്കൂളിനെ നശിപ്പിക്കാന് പരിശ്രമിക്കുകയാണ്.
