കണ്ണൂര്: പ്രീ പ്രൈമറി മേഖലയെക്കുറിച്ച് പഠിക്കാനായി സര്ക്കാര് നിയോഗിച്ച കമ്മീഷന് റിപ്പോര്ട്ട് ഉടന് സര്ക്കാറിന് സമര്പ്പിക്കണമെന്ന് പ്രീ പ്രൈമറി ടീച്ചേഴ്സ് ആന്റ് ഹെല്പ്പേഴ്സ് ഓര്ഗ്ഗനൈസേഷന് സംസ്ഥാന കമ്മറ്റി ആവശ്യപ്പെട്ടു. പ്രീ പ്രൈമറി കമ്മീഷന് സംസ്ഥാന തലത്തിലും മേഖലാതലത്തിലും ഈ മേഖലയിലെ സംഘടനകളുമായും പ്രീ പ്രൈമറി അധ്യാപകരുമായും ആയമാരുമായും കൂടിക്കാഴ്ചകളും തെളിവെടുപ്പും നടത്തിയിരുന്നു. പിപിടിഎച്ച്ഒയുടെ നേതാക്കള് ഈ സിറ്റിംഗുകളില് പങ്കെടുക്കുകയും സമഗ്രമായ നിര്ദ്ദേശങ്ങള് കമ്മീഷന് സമര്പ്പിക്കുകയും ചെയ്തിരുന്നു.
എയ്ഡഡ് സ്കൂളുകളുടെയും ഗവണ്മെന്റ് സ്കൂളുകളുടെയും ഭാഗമായി പ്രീ പ്രൈമറിയെ അംഗീകരിക്കുക, ഓണറേറിയത്തിന് പകരം പിഎസ്സി വഴി നിയമിക്കപ്പെട്ട പ്രീ പ്രൈമറി അധ്യാപകര്ക്കും ആയമാര്ക്കും ലഭിക്കുന്ന അതേ ശമ്പളവും ആനുകൂല്യങ്ങളും എയ്ഡഡ് ഗവണ്മെന്റ് മേഖലയിലെ പ്രീ പ്രൈമറി ജീവനക്കാര്ക്ക് നല്കുക, അന്യായമായ പിരിച്ചുവിടല് അവസാനിപ്പിക്കാനും തൊഴില് സുരക്ഷിതത്വം ഉറപ്പുവരുത്താനും ആവശ്യമായ നടപടികള് സ്വീകരിക്കുക, എല്ലാ ഗവണ്മെന്റ് ടീച്ചേഴ്സ് ട്രെയിനിങ്ങ് സ്ഥാപനങ്ങളൊടുമനുബന്ധിച്ച് പ്രീ പ്രൈമറി മേഖലയില് ഏകീകൃത സിലബസ്സും പാഠപുസ്തകങ്ങളും ലഭ്യമാക്കുക തുടങ്ങിയവയാണ് കമ്മീഷന് സമര്പ്പിച്ച നിര്ദ്ദേശങ്ങള്.
സംസ്ഥാന പ്രസിഡണ്ട് വി.വനജ അധ്യക്ഷത വഹിച്ചു. സംസ്ഥാന സെക്രട്ടറി വി.വിജയഷോമ, കെ.എം.ബീവി, അനൂപ് ജോണ് എരിമറ്റം, പി.എം.ശ്രീകുമാര്, കെ.പി.സുബൈദ, ഉഷാകുമാരി, ഷിനു സാമുവല് എന്നിവര് സംസാരിച്ചു.
സമരം ശക്തിപ്പെടുത്തും: ഗവ കോണ്ട്രാക്ടേഴ്സ് കോ-ഓര്ഡിനേഷന് കമ്മറ്റി
കണ്ണൂര്: ഗവണ്മെന്റ് കരാറുകാര് നടത്തിവരുന്ന ടെണ്ടര് ബഹിഷ്കരണ സമരം ശക്തമായി മുന്നോട്ട് കൊണ്ടുപോകുന്നതിന് ഗവണ്മെന്റ് കോണ്ട്രാക്ടേഴ്സ് കോ-ഓഡിനേഷന് കണ്ണൂര് ജില്ലാ കമ്മറ്റി തീരുമാനിച്ചു.
ഗവണ്മെന്റുമായി നടത്തിയ ചര്ച്ചയില് കരാറുകാര് ഉന്നയിച്ച ആവശ്യങ്ങളില് ഒന്നിനു പോലും അനുകൂലമായ നിലപാടെടുത്തിട്ടില്ല. ജിഎസ്ടി 12 ശതമാനമായി കുറച്ചെങ്കിലും ഇന്പുട്ട് ടാക്സ് കഴിച്ച് ബാക്കി വരുന്ന അധിക തുക എസ്റ്റിമേറ്റില് ഉള്പ്പെടുത്താമെന്ന വാഗ്ദാനത്തില് നിന്ന് ഗവണ്മെന്റ് പിന്നോട്ടു പോയിരിക്കുകയാണ്. അഡ്വാന്സ് ടാക്സ് അടക്കണമെന്നതും എല്ലാമാസവും റിട്ടേണ് സമര്പ്പിക്കണമെന്നുള്ള നിബന്ധനയില് നിന്നും ഗവണ്മെന്റ് പിന്നോട്ടു പോയിട്ടില്ല. ഈ സാഹചര്യത്തില് നടത്തിവരുന്ന സമരം ശക്തമാക്കുന്നതിനും കരാറുകാര് ഏറ്റെടുത്ത പ്രവൃത്തികള് നിര്ത്തിവെക്കുവാനും കോ-ഓര്ഡിനേഷന് കമ്മറ്റി തീരുമാനിച്ചു. യോഗത്തില് ചെയര്മാന് സി.രാജന്, സി.ശശിധരന്, പി.പി.അബ്ദുള് റഹിമാന് എന്നിവര് സംസാരിച്ചു.
