തലവടി: കുട്ടനാട് സാംസ്കാരികവേദി സംഘടിപ്പിച്ച പ്രഥമ ശ്രീനാരായണ എവറോളിങ് ട്രോഫിക്കായുള്ള ആനപ്രമ്പാല് ജലോത്സവത്തില് മോളി ജോണ് ക്യാപ്റ്റനായുള്ള വെളിയനാട് വില്ലേജ് ബോട്ട് ക്ലബ്ബ് തുഴഞ്ഞ മാലിയില് പുളിക്കത്തറ ജയ് ഷോട്ട് വിജയിയായി.
വാശിയേറിയ മത്സരത്തില് പ്രജിത്ത് കൊല്ലശേരി ക്യാപ്റ്റനായുള്ള കൊച്ചമ്മനം ബോട്ട് ക്ലബ്ബ് തുഴഞ്ഞ മണലിയെ ഇഞ്ചുകളുടെ വ്യത്യാസത്തില് പരാജയപ്പെടുത്തിയാണ് ജയ് ഷോട്ട് വിജയിച്ചത്. ബി ഗ്രേഡ് വെപ്പ് വള്ളങ്ങളുടെ മത്സരത്തില് രതീഷ് ക്യാപ്റ്റനായ തലവടി ബോട്ട് ക്ലബ്ബ് തുഴഞ്ഞ ചിറമേല് തോട്ടുകടവന് ഒന്നാമതായി.
കാര്ത്തിക് മൂലയില് ക്യാപ്റ്റനായുള്ള കളങ്ങര വില്ലേജ് ബോട്ട് ക്ലബ്ബിന്റെ ഏബ്രഹാം മൂന്നുതൈക്കലിനാണ് രണ്ടാം സ്ഥാനം. ബി ഗ്രേഡ് വടക്കനോടി വള്ളങ്ങളുടെ ഫൈനല് മത്സരത്തില് ബിനു ഐസക് ക്യാപ്റ്റനായുള്ള വെള്ളക്കിണര് ബ്രദേഴ്സ് തുഴഞ്ഞ ദാനിയേല് ഒന്നാം സ്ഥാനം നേടി.
ലിബു പാക്കള്ളില് ക്യാപ്റ്റനായുള്ള ബിബിസി മുട്ടാറിന്റെ കുറുപ്പ്പറമ്പനാണ് രണ്ടാം സ്ഥാനം. ഫൈബര് ചുണ്ടന് വള്ളങ്ങളുടെ ഫൈനലില് ജഗന്നാഥന് കറുകത്ര ക്യാപ്റ്റനായുള്ള മഹാദേവികാട് വിജയിച്ചു. കുന്തിരിക്കല് ജിബി ഈപ്പന്റെ തൃക്കുന്നപ്പുഴക്കാണ് രണ്ടാം സ്ഥാനം.
എസ്എന്ഡിപി കുട്ടനാട് താലൂക്ക് യൂണിയന് പ്രസിഡന്റ് പി.പി. മധുസൂദനന് ഭദ്രദീപം തെളിയിച്ചു. ജില്ലാ പഞ്ചായത്ത് വികസന കാര്യ സ്ഥിരം സമിതി ചെയര്മാന് കെ.കെ. അശോകന് ജലോത്സവം ഉദ്ഘാടനം ചെയ്തു.
കുട്ടനാട് സാംസ്കാരികവേദി ചെയര്മാന് സി.പി. സൈജേഷ് അധ്യക്ഷത വഹിച്ചു. ജലമേളയുടെ ഫഌഗ് ഓഫ് കര്മം ഗ്രാമപ്പഞ്ചായത്ത് പ്രസിഡന്റ് ജനൂപ് പുഷ്പാകരനും സമ്മാനദാനം ജില്ലാപ്പഞ്ചായത്തംഗം ബിനു ഐസക് രാജുവും നിര്വഹിച്ചു.
