പാറശ്ശാല: നിര്മല് നിക്ഷേപത്തട്ടിപ്പ് കേസില് രണ്ടുപേരെ നിക്ഷേപകര് പിടികൂടി പോലീസിന് കൈമാറി. ഒളിവിലായിരുന്ന സ്ഥാപനത്തിലെ ജീവനക്കാരന് പളുകല് കുഴിവിളാകം ചൈത്രം വീട്ടില് ചന്ദ്രശേഖരന് (65), നിര്മല് കൃഷ്ണയുടെ ബിനാമിയെന്ന് അരോപിക്കപ്പെടുന്ന കന്നുമാമൂട് ഈശ്വരവിലാസത്തില് പ്രദീപ് (52) എന്നിവരെയാണ് നിക്ഷേപകര് പിടികൂടി പളുകല് പോലീസിന് കൈമാറിയത്.
ബാങ്ക് പുട്ടിയത് മുതല് ഒളിവിലായിരുന്ന ചന്ദ്രശേഖരന് കഴിഞ്ഞദിവസം കര്മസമിതിയുടെ നേതൃത്വത്തില് ബാങ്കിന് മുന്നില് അനിശ്ചിതകാല സമരം നടത്തുന്ന നിക്ഷേപകരുടെ മുന്നില് എത്തുകയായിരുന്നു. നിക്ഷേപകര് ഉടനെ പിടികൂടി പോലീസില് ഏല്പിക്കുകയായിരുന്നു. തുടര്ന്ന് കര്മസമിതി പ്രതിഷേധറാലിയായി കന്നുമാമൂട്ടിലുള്ള നിര്മല് കൃഷ്ണയുടെ നിഖില് പ്ലാസ എന്ന കെട്ടിടസമുച്ചയത്തില് പ്രവര്ത്തിക്കുന്ന നിര്മല് കൃഷ്ണയുടെ പേരിലുള്ള കന്യാകുമാരി എക്സ്പോര്ട്ട്സിന്റെ ഓഫീസും കശുവണ്ടി ഔട്ട്ലൈറ്റ് വില്പനകേന്ദ്രം എന്നിവ മറ്റൊരു താക്കോല് ഉപയോഗിച്ചു പൂട്ടുകയായിരുന്നു.
തുടര്ന്ന് കെട്ടിട സമുച്ചയത്തില് നിന്ന് ബിനാമി ബന്ധം ആരോപിക്കുന്ന പ്രദീപിനെയും പിടികൂടി. സ്ത്രീകളടക്കം നൂറുകണക്കിന് നിക്ഷേപകരു ടെ നേതൃത്വത്തിലാണ് പിടിയിലായവരെ പളുകല് പോലീസില് ഏല്പിക്കുകയായിരുന്നു.
കേസ് അന്വേഷിക്കുന്ന തമിഴ്നാട് സാമ്പത്തികത്തട്ടിപ്പ് അന്വേഷണസംഘത്തിന് ഇരുവരെയും കൈമാറിയെങ്കിലും രാത്രിയോടെ ചോദ്യം ചെയ്തശേഷം തട്ടിപ്പുമായി നേരിട്ട് ബന്ധമില്ലാത്തതിനാല് രാത്രിയോടെ ഇവരെ വിട്ടയച്ചു.
