തൃശൂര്: പുഴക്കല് മുതല് മുതുവറ വരെയുള്ള റോഡിലെ മരണക്കുഴികള്ക്ക് ഉടന് പരിഹാരം വേണമെന്നാവശ്യപ്പെട്ട് ബിജെപി വടക്കാഞ്ചേരി നിയോജകമണ്ഡലം കമ്മിറ്റിയുടെ ആഭിമുഖ്യത്തില് പ്രതിഷേധയോഗം സംഘടിപ്പിച്ചു.
മുതുവറ മുതല് പുഴയ്ക്കല് വരെ മനുഷ്യമതിലും തീര്ത്തു. മണ്ഡലം പ്രസിഡണ്ട് കെ.ഗിരീഷ് അദ്ധ്യക്ഷത വഹിച്ചു. യോഗം ബിജെപി ജില്ല പ്രസിഡണ്ട് എ.നാഗേഷ് ഉദ്ഘാടനം ചെയ്തു.
വാക്കുകളില് മാത്രമാണ് വടക്കാഞ്ചേരി മണ്ഡലത്തിന്റെ വികസനമെന്നും, 500 മീറ്റര് റോഡ്പോലും ശരിയാക്കാന് സാധിക്കാത്തവരാണ് എംഎല്എ അനില് അക്കരയും ജില്ലയിലെ മൂന്ന് മന്ത്രിമാരുമെങ്കില് ജനങ്ങളോട് മാപ്പ് പറഞ്ഞ് രാജിവെക്കുന്നതായിരിക്കും നല്ലതെന്നും അദ്ദേഹം പറഞ്ഞു. പരിഹാരം ഉടന് ഉണ്ടായില്ലെങ്കില് ജനകീയപ്രക്ഷോഭത്തിന് ബിജെപി നേതൃത്വം നല്കുമെന്നും നാഗേഷ് കൂട്ടിച്ചേര്ത്തു.
സുരേന്ദ്രന് ഐനിക്കുന്നത്ത്, അഡ്വ. ഉല്ലാസ്ബാബു, ഇ.വി.കൃഷ്ണന് നമ്പൂതിരി തുടങ്ങിയവര് സംസാരിച്ചു.സുരേന്ദ്രന് ചിറ്റിലപ്പിള്ളി, വിശ്വംഭരന്, നന്ദന് മുള്ളൂര്, വിനയന് കൈപ്പറമ്പ്, രാജേഷ് അടാട്ട്, ബിജീഷ് ഭാസ്കര്, മിനല് കൈപ്പറമ്പ്, പ്രമോദ് കൈപ്പറമ്പ്, വിപിന്ചന്ദ്രന്, സിബീഷ് തോളൂര് എന്നിവര് നേതൃത്വം നല്കി.
