കണ്ണൂര്: കണ്ണൂര് നിയോജക മണ്ഡലത്തിലെ 90 സ്കൂളുകളിലെയും ഓരോ ക്ലാസ് മുറി വീതം ഹൈട്ടെക്കാക്കുന്ന പദ്ധതി ആരംഭിച്ചതായി മന്ത്രി രാമചന്ദ്രന് കടന്നപ്പള്ളി അറിയിച്ചു. ജില്ലാ കലക്ടറുടെ ചേംബറില് നടന്ന മണ്ഡലം വികസന പദ്ധതികളുടെ അവലോകന യോഗത്തില് സംസാരിക്കുകയായിരുന്നു അദ്ദേഹം.
ഡെസ്ക് ടോപ്പ്, ലാപ്ടോപ്പ് കംപ്യൂട്ടറുകള്, മള്ട്ടി മീഡിയ പ്രൊജക്ടര്, വൈറ്റ് ബോര്ഡ്, സൗണ്ട് സിസ്റ്റം എന്നിവ ഉള്പ്പെടുന്ന പദ്ധതിക്കായി 75 ലക്ഷം രൂപയാണ് എം.എല്.എ ഫണ്ടില് നിന്ന് വകയിരുത്തിയിരിക്കുന്നത്. കെല്ട്രോണ് വഴി നടപ്പിലാക്കുന്ന പദ്ധതിക്ക് ഇതിനകം ഭരണാനുമതി ലഭിച്ചതായും ഒക്ടോബര് 15നകം ഇത് പൂര്ത്തിയാക്കുമെന്നും അദ്ദേഹം പറഞ്ഞു.
സംസ്ഥാന സര്ക്കാരിന്റെ മദ്യവര്ജ്ജന പരിപാടിയായ വിമുക്തി പദ്ധതിയും ആരോഗ്യ വിദ്യാഭ്യാസ മേഖലകളിലെ പ്രവര്ത്തനങ്ങളും ശക്തിപ്പെടുത്താന് യോഗത്തില് സംസാരിച്ച പി.കെ ശ്രീമതി എംപി ഉദേ്യാഗസ്ഥര്ക്ക് നിര്ദ്ദേശം നല്കി. മണ്ഡലത്തിലെ പൂര്ത്തീകരിച്ച പദ്ധതികള് താമസിയാതെ ജനങ്ങള്ക്കായി തുറന്നുകൊടുക്കുവാനും ശേഷിക്കുന്ന പദ്ധതികള് സമയബന്ധിതമായി പൂര്ത്തിയാക്കുവാനും മന്ത്രി നിര്ദേശിച്ചു. യോഗത്തില് എഡിഎം ഇ.മുഹമ്മദ് യൂസുഫ്, ജില്ലാതല ഉദ്യോഗസ്ഥര് തുടങ്ങിയവര് പങ്കെടുത്തു.
