കണ്ണൂര്: ഒക്ടോബര് 6 മുതല് 28 വരെ കൊച്ചിയുള്പ്പെടെ രാജ്യത്തിന്റെ വിവിധ ഭാഗങ്ങളിലുള്ള ആറ് വേദികളിലായി നടക്കുന്ന ഫിഫ അണ്ടര് 17 ലോകകപ്പ് ഫുട്ബോല് മല്സരങ്ങളുടെ പ്രചരണാര്ത്ഥം ജില്ലയില് അഞ്ച് ലക്ഷം ഗോളുകളടിക്കാന് തീരുമാനം. സംസ്ഥാന തലത്തില് സ്പോര്ട്സ് കൗണ്സിലും കായിക യുവജന കാര്യാലയവും സംയുക്തമായി നടപ്പാക്കുന്ന വണ് മില്യന് ഗോള് കാംപയിന്റെ ഭാഗമായുള്ള പരിപാടി ജില്ലാ ആസൂത്രണ സമിതി യോഗത്തില് ജില്ലാ സ്പോര്ട്സ് കൗണ്സില് പ്രസിഡണ്ട് ഒ.കെ.വിനീഷ് വിശദീകരിച്ചു. ഫുട്ബോളിന്റെ പ്രചാരണത്തിനായുള്ള ഈ ക്യാമ്പയിന് വഴി ലിംക ബുക്ക് ഓഫ് റൊക്കോര്ഡ്സില് സ്ഥാനം പിടിക്കാനാണ് ലക്ഷ്യം.
സപ്തംബര് 27ന് വൈകിട്ട് 3 മണി മുതല് 7 മണി വരെയാണ് പ്രായഭേദമില്ലാതെ ജനകീയ പങ്കാളിത്തത്തോടെയുള്ള ഗോളടി കാംപയിന് സംഘടിപ്പിക്കുക. തദ്ദേശ സ്ഥാപനങ്ങളുടെ നേതൃത്വത്തില് വിവിധ കേന്ദ്രങ്ങളിലും സ്കൂള്, കോളേജ് തുടങ്ങി വിദ്യാഭ്യാസ സ്ഥാപനങ്ങളിലും പ്രത്യേക ചടങ്ങുകള് സംഘടിപ്പിച്ച് എല്ലാവരും ഓരോ ഗോളടിക്കുന്നതാണ് പരിപാടി. ഗോളിയില്ലാത്ത തുറന്ന പോസ്റ്റിലേക്ക് പെനാല്റ്റി കിക്കെടുക്കുന്ന സ്പോട്ടില് പന്ത് വച്ചാണ് ഗോളടിക്കുക. നിലവിലുള്ള ഗോള് പോസ്റ്റ് ഉപയോഗിക്കുകയോ താല്ക്കാലികമായി കെട്ടിയുണ്ടാക്കുകയോ ചെയ്യാം.
ഓരോ രജിസ്റ്റര് ചെയ്ത ഗോളടി കേന്ദ്രത്തിലും ഗോളിന്റെ എണ്ണം തിട്ടപ്പെടുത്താന് വളണ്ടിയറെ നിശ്ചയിക്കും. കേന്ദ്രം, വളണ്ടിയര് എന്നിവ പ്രത്യേക മൊബൈല് ആപ്പ് വഴി രജിസ്റ്റര് ചെയ്യണം,. മൊബൈല് ആപ്പില് ലഭിക്കുന്ന വിവരങ്ങളുടെ അടിസ്ഥാനത്തിലാണ് ഗോളുകളുടെ എണ്ണം തിട്ടപ്പെടുത്തുക. കൂടുതല് ഗോളുകളടിക്കുന്ന തദ്ദേശ സ്ഥാപനങ്ങള്, വിദ്യാലയങ്ങള് എന്നിവയ്ക്ക് സമ്മാനം ലഭിക്കും. ഓരോ ജില്ലയിലും കാംപയിനില് പങ്കെടുത്ത് ഗോളടിക്കുന്നവരില് നിന്ന് നറുക്കെടുപ്പിലൂടെ തെരഞ്ഞെടുക്കപ്പെടുന്ന രണ്ട് പേര്ക്ക് കൊച്ചിയില് നടക്കുന്ന ഒരു മല്സരം കാണാന് അവസരം ലഭിക്കും.
