കണ്ണൂര്: വേങ്ങാട് ഇ.കെ.നായനാര് സ്മാരക ഗവ.ഹയര് സെക്കണ്ടറി സ്കൂള് അന്താരാഷ്ട്ര നിലവാരത്തിലേക്ക് ഉയര്ത്താനുളള ജനകീയ കൂട്ടായ്മ മുഖ്യമന്ത്രി പിണറായി വിജയന് ഉദ്ഘാടനം ചെയ്തു.
സര്ക്കാര് സ്കൂളുകളുടെ നിലവാരമുയര്ത്താനുളള പ്രവര്ത്തനങ്ങള്ക്ക് സര്ക്കാര് ആദ്യമേ ഫണ്ട് നല്കും. മികച്ച സാമ്പത്തിക ശേഷിയുളള കോര്പ്പറേറ്റ് മാനേജ്മെന്റുകളും ഈ രംഗത്തുണ്ട്. അവക്ക് സര്ക്കാര് ഫണ്ട് നല്കില്ല. എന്നാല് സാമ്പത്തിക ശേഷിയില്ലാത്ത ഒറ്റ സ്കൂള് മാനേജ്മെന്റുകളാണ് ധാരാളം. ഇവയുടെ കാര്യത്തില് മാനേജ്മെന്റുകളും പിടി എ യും പൂര്വ്വ വിദ്യാര്ത്ഥി സംഘടനകളും തദ്ദേശ സ്ഥാപനങ്ങളും നാട്ടുകാരും കൈകോര്ത്ത് വിഭവ സമാഹരണം നടത്തണം. എംഎല്എ-എംപി ഫണ്ടും ഉപയോഗപ്പെടുത്താനാവും. ഇതെല്ലാം ഇത്തരം സ്കൂളുകളെ നിലനിര്ത്താനാണ്. വിദ്യാലയങ്ങള് നാടിന്റെ ഒരു പരിഛേദമാണ് – മുഖ്യമന്ത്രി പറഞ്ഞു.
ചടങ്ങില് ജില്ലാ പഞ്ചായത്ത് പ്രസിഡണ്ട് കെ.വി.സുമേഷ് അധ്യക്ഷത വഹിച്ചു. സ്കൂള് വികസനസമിതി ചെയര്മാന് പി.ബാലന് സ്വാഗതവും പ്രിന്സിപ്പല് എന്.ഉത്തമന് നന്ദിയും പറഞ്ഞു.
