ചണ്ഡിഗഡ്: മാനഭംഗക്കേസില് ശിക്ഷ അനുഭവിക്കുന്ന ദേരാ സച്ചാ സൗദ നേതാവ് ഗുര്മീത് റാം റഹിം സിംഗിന്റെ സിര്സയിലെ ആശ്രമത്തില് പോലീസ് പരിശോധന. പഞ്ചാബ് ആന്ഡ് ഹരിയാന ഹൈക്കോടതിയുടെ ഉത്തരവിനെ തുടര്ന്നാണ് ആശ്രമത്തില് പോലീസ് പരിശോധന നടത്തുന്നത്.
പരിശോധനയോടനുബന്ധിച്ച് സിര്സയില് നിരോധനാജ്ഞ പ്രഖ്യാപിച്ചു. കനത്ത സുരക്ഷയാണ് സിര്സയില് ഒരുക്കിയിരിക്കുന്നത്. പഞ്ചാബ്-ഹരിയാന ഹൈക്കോടതികള് നിയമിച്ച കമ്മിഷണര് എ.കെ.എസ്. പവാറിന്റെ നേതൃത്വത്തിലാണ് പരിശോധന. 41 കമ്പനി അര്ദ്ധ സൈനിക വിഭാഗം, നാല് കമ്പനി സൈനിക വിഭാഗം, വിവിധ സംസ്ഥാനങ്ങളില് നിന്നുളള പോലീസ് സേന, ഡോഗ് സ്ക്വാഡ് എന്നിവയാണ് പരിശോധനയ്ക്കായി വിന്യസിച്ചിരിക്കുന്നത്.
സിര്സയിലെ ആശുപത്രി, വിദ്യാഭ്യാസ സ്ഥാപനങ്ങള്, റിസോര്ട്ടുകള് തുടങ്ങിയ സ്ഥലങ്ങളിലാണ് പരിശോധന. 800 ഏക്കര് സ്ഥലത്താണ് ദേരാ സച്ചാ സൗദയുടെ ആശ്രമം നിലകൊള്ളുന്നത്.
ഗുര്മീത് കുറ്റക്കാരനാണെന്ന് കോടതി വിധി വന്നതിനു പിന്നാലെ ഉണ്ടായ കലാപത്തില് 38 പേരാണ് ഹരിയാനയിലെ പഞ്ച്കുലയിലും സിര്സയിലും മരിച്ചത്. 264 പേര്ക്ക് പരിക്കേറ്റിരുന്നു. ഡല്ഹിയിലും പഞ്ചാബിലെ വിവിധ സ്ഥലങ്ങളിലും കലാപങ്ങള് ഉണ്ടായിരുന്നു.
