ചേര്ത്തല: ഓണത്തെ എതിരേല്ക്കാന് കലാവിരുന്ന് ഒരുക്കി കലാ സാംസ്കാരിക സംഘടനകള്. മുട്ടത്തിപ്പറമ്പ് ചില്ഡ്രന്സ് സ്റ്റാര് ആര്ട്ട്സ് ആന്റ് സ്പോര്ട്ട്സ് ക്ലബിന്റെ ആഭിമുഖ്യത്തില് നാല്, അഞ്ച് ആറ് തീയതികളില് ഓണാഘോഷം നടക്കും. നാളെ രാവിലെ ഒന്പതിന് പതാക ഉയര്ത്തല്, 9.30 ന് അഗതികളായ വൃദ്ധജനങ്ങള്ക്ക് ഓണപ്പുടവ വിതരണം ചെയ്യും.
പത്തിന് കായിക മത്സരങ്ങള്, വൈകിട്ട് ഏഴിന് നാട്യാഞ്ജലി, രാത്രി എട്ടിന് സൂപ്പര് സോങ് മത്സരം. അഞ്ചിന് ഉച്ചയ്ക്ക് രണ്ടിന് കബഡി മല്സരം, 3.30 ന് വടംവലി, വൈകിട്ട് ഏഴിന് കലാസന്ധ്യ, ഹാസ്യവിരുന്ന്, രാത്രി എട്ടിന് സര്ഗസന്ധ്യ, ഒന്പതിന് നാടകം. ആറിന് രാവിലെ 1.30 ന് ചിത്രരചന മത്സരം, ഉച്ചയ്ക്ക് രണ്ടിന് ക്വിസ് മത്സരം. വൈകിട്ട് ആറിന് സാംസ്കാരിക സമ്മേളനം മന്ത്രി പി. തിലോത്തമന് ഉദ്ഘാടനം ചെയ്യും. പ്രസിഡന്റ് ജിതുമോന് അദ്ധ്യക്ഷനാകും.
പരീക്ഷകളില് ഉന്നത വിജയം നേടിയ വിദ്യാര്ത്ഥികളെ എസ്ഐ സി.സി പ്രതാപചന്ദ്രന് അനുമോദിക്കും. സംസ്ഥാന യുവജന ക്ഷേമബോര്ഡ് അംഗം മനു.സി പുളിക്കല് വിശിഷ്ടാതിഥിയാകും. പി. കെ. ഷാജി മുഖ്യപ്രഭാഷണം നടത്തും. സിനിമാ സീരിയല് താരങ്ങളെ പങ്കെടുപ്പിച്ച് 12 മണിക്കൂര് ഓണാഘോഷപരിപാടികളുടെ തല്സമയ ദൃശ്യവിരുന്ന് ഒരുക്കുന്നു.
കെഎംസിഎന് ചാനലാണ് അവിട്ടം നാളില് പുതുമയാര്ന്ന പരിപാടി ഒരുക്കിയിട്ടുള്ളത്. ഓണോത്സവം എന്ന പേരില് പാരമ്പര്യ തനിമ നിലനിര്ത്തുന്ന ആഘോഷ പരിപാടികളാണ് സംഘടിപ്പിച്ചിട്ടുള്ളതെന്ന് എംഡി സുനില് ലാല്, ബിനൂപ്.പി ചാക്കോ, ജയദേവന് കലവൂര്, രഞ്ജിത്ത് സ്കറിയ, രാജേന്ദ്രന്, പ്രതീഷ് എന്നിവര് പറഞ്ഞു. രാവിലെ എട്ടിന് ആരംഭിക്കുന്ന സപ്രേഷണം രാത്രി എട്ടിന് സമാപിക്കും. മയൂരി ജീവകാരുണ്യ ചാരിറ്റബിള് സൊസൈറ്റിയുടെ ആഭിമുഖ്യത്തില് ഇന്ന് ഓണക്കോടി വിതരണവും ഓണസദ്യയും നടക്കും. ഉച്ചയ്ക്ക് 12.30 ന് ഗവ. ആയുര്വേദ ആശുപത്രിയിലും ഒന്നിന് ഗവ. താലൂക്ക് ആശുപത്രിയിലുമാണ് സദ്യ ഒരുക്കിയിട്ടുള്ളത്.
താലൂക്ക് ആശുപത്രി അങ്കണത്തില് മന്ത്രി പി. തിലോത്തമനും നഗരസഭ ചെയര്മാന് ഐസക് മാടവനയും ചേര്ന്ന് ഉദ്ഘാടനം ചെയ്യും. ഗാനരചയിതാവ് രാജീവ് ആലുങ്കല്, കെ.പി ഗോപകുമാര് എന്നിവര് ഓണക്കോടി വിതരണം ചെയ്യും. വേളോര്വട്ടം ഭാവന കലാസമിതി ഗ്രന്ഥശാലയുടെ ആഭിമുഖ്യത്തില് നാളെ ഓണാഘോഷവും വാര്ഷികവും നടക്കും. വൈകിട്ട് അഞ്ചിന് നടക്കുന്ന സമ്മേളനം പ്രഫ. തോമസ്.വി പുളിക്കന് ഉദ്ഘാടനം ചെയ്യും. രാമന് ജനാര്ദ്ദനന് അദ്ധ്യക്ഷത വഹിക്കും. ഏഴിന് ഭാവനോത്സവം, തുടര്ന്ന് സമ്മാനദാനം, രാത്രി ഒന്പതിന് നാടകം. സംസ്കാരയുടെ ഓണാഘോഷം ആറ് ഒന്പത് തീയതികളില് നടക്കും.
ആറിന് ഉച്ചയ്ക്ക് 2.30 ന് അഴീക്കോടന് സ്മാരക ഹാളില് വെട്ടയ്ക്കല് മജീദ് ഉദ്ഘാടനം ചെയ്യും. പൂച്ചാക്കല് ഷാഹുല് അദ്ധ്യക്ഷനാകും. ആലപ്പി ഋഷികേശ് സന്ദേശം നല്കും. ജോസഫ് മാരാരിക്കുളം പ്രഭാഷണം നടത്തും. തുടര്ന്ന് കരപ്പുറം രാജശേഖരന് സന്ദേശം നല്കും. ഒന്പതിന് ഉച്ചയ്ക്ക് രണ്ടിന് ചേരുന്ന സമാപന സമ്മേളനം പ്രൊഫ. തോമസ്.വി പുളിക്കന് ഉദ്ഘാടനം ചെയ്യും.
എസ്എല് പുരം കലാസാഗര് ആര്ട്ട്സ് ആന്റ് സ്പോര്ട്ട്സ് ക്ലബിന്റെ വാര്ഷികവും ഓണാഘോഷവും ആറ്, ഏഴ് തീയതികളില് നടക്കും. ആറിന് രാവിലെ എട്ടിന് നടക്കുന്ന കൂട്ടയോട്ടം കെ. കെ. പ്രതാപന് ഫഌഗ് ഓഫ് ചെയ്യും. പത്തിന് കായിക മത്സരം, ഉച്ചയ്ക്ക് 2.30 ന് പ്രസംഗമത്സരം, മൂന്നിന് നാടന്പാട്ട് മത്സരം, വൈകിട്ട് അഞ്ചിന് നാടകം, രാത്രി എട്ടിന് മിമിക്രി, ഒന്പതിന് നൃത്തനൃത്ത്യം. ഏഴിന് രാവിലെ പത്തിന് ക്വിസ് മത്സരം, വൈകിട്ട് അഞ്ചിന് കുമ്മാട്ടിക്കളി, 5.30 ന് ചേരുന്ന സാംസ്കാരിക സമ്മേളനം ജില്ലാ പഞ്ചായത്ത് പ്രസിഡന്റ് ജി. വേണുഗോപാല് ഉദ്ഘാടനം ചെയ്യും. കഞ്ഞിക്കുഴി പഞ്ചായത്ത് പ്രസിഡന്റ് എം. ജി. രാജു അദ്ധ്യക്ഷത വഹിക്കും. എന്.എസ്. വിനോദ് മുഖ്യപ്രഭാഷണം നടത്തും.
കാവ്യതീരം അവാര്ഡ് ജോതാവ് വിദ്വാന് കെ. രാമകൃഷ്ണനെ ആദരിക്കും. സംസ്ഥാന സ്കൂള് യുവജനോത്സവത്തില് മിമിക്രിക്ക് ഒന്നാം സമ്മാനം കരസ്ഥമാക്കിയ എച്ച്. ഹനീഷിനെ ചടങ്ങില് അനുമോദിക്കും. പഞ്ചായത്ത അംഗങ്ങളായ എസ്. വി. ബാബു ക്യാഷ് അവാര്ഡുകളും ലതിക തിലകന് സമ്മാനങ്ങളും വിതരണം ചെയ്യും.
