ണ്ണൂര്: കേന്ദ്ര റോഡ് ഫണ്ട് പദ്ധതിയില് ഇത്തവണ കേരളത്തിന് ലഭിച്ച 400 കോടിയുടെ 30 റോഡ് പ്രവൃത്തികളില് 150 കോടിയിലേറെ രൂപയുടെ 12 പ്രവൃത്തികളും കണ്ണൂര് ജില്ലക്ക് ലഭ്യമാക്കാനായതായി മന്ത്രി ജി.സുധാകരന് പറഞ്ഞു. അഞ്ച് കോടിയുടെ നബാര്ഡ് ഫണ്ട് ഉപയോഗിച്ച് അഭിവൃദ്ധിപ്പെടുത്തുന്ന തോട്ടട – അയ്യാരത്ത് റോഡിന്റെ പ്രവൃത്തി ഉദ്ഘാടനം തെരുമണ്ഡപത്തിന് സമീപം നിര്വഹിച്ച് സംസാരിക്കുകയായിരുന്നു മന്ത്രി. വികസനകാര്യത്തില് കാലങ്ങളായി ഏറെ പിന്നാക്കം നില്ക്കുന്ന ജില്ലയെന്ന നിലയില് സംസ്ഥാന സര്ക്കാര് പ്രത്യേക പരിഗണനയാണ് കണ്ണൂരിന് നല്കുന്നത്. വികസനകാര്യത്തില് രാഷ്ട്രീയമോ അല്ലാത്തതോ ആയ ഒരു പക്ഷപാതവും പാടില്ലെന്ന നിലപാടാണ് സര്ക്കാരിനുള്ളതെന്നും ഭരണ-പ്രതിപക്ഷ വേര്തിരിവ് നോക്കാതെയാണ് പദ്ധതികള് അനുവദിക്കുന്നതെന്നും മന്ത്രി പറഞ്ഞു. തനിക്ക് ലഭിച്ച പൊതുമരാമത്ത്, രജിസ്ട്രേഷന് വകുപ്പുകളില് നിന്ന് അഴിമതി ഏറെക്കുറെ തുടച്ചുമാറ്റാനായതായും മുന് കാലങ്ങളിലെ പോലെ കൈക്കൂലി ചോദിച്ചുവാങ്ങുന്ന അവസ്ഥ ഇപ്പോഴില്ലെന്നും മന്ത്രി പറഞ്ഞു. ചടങ്ങില് മന്ത്രി രാമചന്ദ്രന് കടന്നപ്പള്ളി അധ്യക്ഷത വഹിച്ചു. പി.കെ.ശ്രീമതി എംപി, മേയര് ഇ.പി.ലത, കൗണ്സിലര്മാരായ എം.പി.മുഹമ്മദലി, കെ.ഭാരതി, സുമ ബാലകൃഷ്ണന്, പൊതുമരാമത്ത് വകുപ്പ് സൂപ്രണ്ടിംഗ് എഞ്ചിനീയര് പി.കെ.മിനി, എക്സി. എഞ്ചിനീയര് എം.ശശികുമാര്, പാര്ട്ടി പ്രതിനിധികള് തുടങ്ങിയവര് സംസാരിച്ചു. ഇതിനു പുറമെ, പയ്യന്നൂര് കോത്തായിമുക്ക് ദേശീയപാതയില് നിന്നാരംഭിച്ച് കാങ്കോല്, പെരിങ്ങോം സിആര്പിഎഫ് കേന്ദ്രത്തിനു മുന്നില് എത്തിച്ചേരുന്ന പയ്യന്നൂര്-ചെറുപുഴ റോഡ്, കുയ്യാലി-കൊളശ്ശേരി-എരഞ്ഞോളി-തോട്ടുമ്മല്-കതിരൂര് റോഡ് എന്നിവ കേന്ദ്ര റോഡ് ഫണ്ട് പദ്ധതിയില് ഉള്പ്പെടുത്തി അഭിവൃദ്ധിപ്പെടുത്തുന്ന പ്രവൃത്തികളുടെ ഉദ്ഘാടനവും മന്ത്രി ജി.സുധാകരന് നിര്വഹിച്ചു. കാങ്കോലില് നടന്ന ചടങ്ങില് സി.കൃഷ്ണന് എംഎല്എ അധ്യക്ഷത വഹിച്ചു. പയ്യന്നൂര് ബ്ലോക്ക് പഞ്ചായത്ത് പ്രസിഡന്റ് സി സത്യപാലന്, പയ്യന്നൂര് മുനിസിപ്പാലിറ്റി ചെയര്മാന് ശശി വട്ടക്കൊവ്വല് തുടങ്ങിയവര് സംസാരിച്ചു. കൊളശ്ശേരിയില് നടന്ന ചടങ്ങില് എ.എന്.ഷംസീര് എംഎല്എ അധ്യക്ഷത വഹിച്ചു.
