ആലപ്പുഴ: പൊതുസ്ഥലങ്ങളില് മാലിന്യം നിക്ഷേപിക്കുന്നവരെ പിടികൂടുന്നതിനുള്ള നഗരസഭയുടെ പരിശോധനകള് നിലയ്ക്കുകയും, കുറ്റക്കാര്ക്കെതിരെ പിഴയീടാക്കുന്നതും നാമമാത്രമാകുകയും ചെയ്തതോടെ നഗരത്തിലെ ഇടറോഡുകള് വീണ്ടും മാലിന്യ നിക്ഷേപകേന്ദ്രങ്ങളായി.
നഗരത്തിന്റെ വടക്കന് മേഖലയിലെ കാളാത്ത് തോപ്പുവെളി റോഡ്, കാളാത്ത് ഗ്യാസ് ഏജന്സി റോഡ്, മാമ്മൂട് ലിയോതേര്ട്ടീന്ത് സ്കൂള് റോഡ് എന്നിവിടങ്ങളിലും തെക്കന്മേഖലയിലെ ഇവാഞ്ചലിക്കല് ചര്ച്ച് റോഡ്, ബാലഭവന് റോഡ്, വ്യവസായ കേന്ദ്രത്തിന് എതിര്വശം വടക്കോട്ടുള്ള വഴി, ഗോള്ഡന് ഫാക്ടറി റോഡ്, ഇര്ഷാദ് പള്ളി ആലിശേരി അന്പലം റോഡ്, കളക്ടറേറ്റിന് വടക്കുവശം പടിഞ്ഞാറേക്കുള്ള റോഡ്, പഴവങ്ങാടി സെന്റ് ആന്റണീസ് സ്കൂള് ബിജെപി ഓഫീസ് റോഡ്, വീരയ്യ ഇടുക്ക് റോഡ്, കളര്കോട് ജങ്ഷന്- കൈതവന ജങ്ഷന് റോഡ് എന്നിവിടങ്ങളിലൊക്കെ മാലിന്യകൂമ്പാരമായിരിക്കുകയാണ്.
പ്ലാസ്റ്റിക് കിറ്റുകളിലും ചെറിയ ചാക്കുകളിലുമായി പാതയോരത്തെ കാടുപിടിച്ച പ്രദേശങ്ങളിലും ആളൊഴിഞ്ഞ സ്ഥലങ്ങളിലുമാണ് മാലിന്യങ്ങള് നിക്ഷേപിക്കുന്നത്.
നേരത്തെ നഗരസഭ ആരോഗ്യവിഭാഗത്തിന്റെ നേതൃത്വത്തില് പൊതുസ്ഥലങ്ങളില് മാലിന്യം നിക്ഷേപിക്കുന്നവരെ കണ്ടെത്തുന്നതിനും പിഴയടക്കമുള്ള നടപടികള് സ്വീകരിക്കുന്നതിനുമായി രാത്രികാല സ്ക്വാഡ് അടക്കം പ്രവര്ത്തിച്ചിരുന്നു. എന്നാല് സമീപകാോലത്തായി ഇവയുടെ പ്രവര്ത്തനം കടലാസില് മാത്രം ഒതുങ്ങിയതോടെയാണ് മാലിന്യ നിക്ഷേപം വര്ധിച്ചിരിക്കുന്നതെന്നാണ് നാട്ടുകാര് പറയുന്നത്.
മാലിന്യ സംസ്കരണ കാര്യത്തില് സംസ്ഥാനത്തിന് തന്നെ മാതൃകയാകുന്ന പദ്ധതി നടപ്പാക്കി വിജയിച്ച ആലപ്പുഴ നഗരസഭ ഓരോ വര്ഷം കഴിയുമ്പോഴും കൈവരിച്ച നേട്ടത്തില് നിന്ന് പിന്നോക്കം പോകുകയാണെന്ന് ആക്ഷേപവുമുയര്ന്നിട്ടുണ്ട്.
എയറോബിക് കംപോസ്റ്റുകള് നഗരസഭപരിധിയിലെ ഭൂരിഭാഗം വാര്ഡുകളിലും സ്ഥാപിച്ചു കഴിഞ്ഞെങ്കിലും പാതയോരത്തെ മാലിന്യ നിക്ഷേപം അഭങ്കുരം തുടരുകയാണ്. നഗരസഭ ആരോഗ്യ വിഭാഗത്തിനാണ് പൊതുസ്ഥലങ്ങളിലെ മാലിന്യ നിക്ഷേപം അടക്കമുള്ളവ തടയുന്നതിനുള്ള ചുമതല എന്നാല് ഈ കാര്യത്തില് കാര്യക്ഷമമായ ഇടപെടല് അധികൃതരുടെ ഭാഗത്തുനിന്നില്ലെന്നതാണ് പൊതുജങ്ങളുടെയും പൊതുപ്രവര്ത്തകരുടെയും പരാതി.
കാലവര്ഷത്തോടനുബന്ധിച്ച് ഡെങ്കിപ്പനി അടക്കമുള്ള പകര്ച്ചവ്യാധികള് റിപ്പോര്ട്ടു ചെയ്തതിന്റെ അടിസ്ഥാനത്തില് കാര്യക്ഷമമായി ശുചീകരണം നടത്തിയെന്ന് അധികൃതര് അവകാശപ്പെട്ട് ആഴ്ചകള് മാത്രം പിന്നിടുന്പോഴാണ് ഇത്തരത്തില് മാലിന്യങ്ങളുടെ ദുര്ഗന്ധം അആലപ്പുഴ നഗരത്തിലെ ഇടറോഡുകളില് നിന്ന് വമിക്കുന്നത്.
