ഇടുക്കി: ചിന്നക്കനാലിലെ തച്ചങ്കരി എസ്റ്റേറ്റില് കാട്ടാന ഷോക്കേറ്റ് ചെരിഞ്ഞ സംഭവത്തില് എസ്റ്റേറ്റ് ഉടമ ടിസണ് തച്ചങ്കരിക്കും എസ്റ്റേറ്റിലെ ജോലിക്കാരനുമെതിരേ വന്യജീവി സംരക്ഷണ നിയമ പ്രകാരം വനംവകുപ്പ് കേസെടുത്തു. എസ്റ്റേറ്റ് ജീവനക്കാരന് ഷിജോയെ ഇന്നലെ വൈകിട്ടോടെ ദേവികുളം റേഞ്ച് ഓഫീസര് കസ്റ്റഡിയിലെടുത്തു.
എസ്റ്റേറ്റിലെ വേലിയില്ക്കൂടി കടന്ന് വന്ന വൈദ്യുതിയേറ്റാണ് കാട്ടാന ചെരിഞ്ഞതെന്ന കണ്ടെത്തലിനെത്തുടര്ന്നാണ് കേസെടുത്തതെന്ന് റെയ്ഞ്ചര് പറഞ്ഞു. കസ്റ്റഡിയിലുള്ളയാളെ ചോദ്യം ചെയ്ത് വരികയാണ്. മൂന്ന് വര്ഷം കഠിന തടവും പിഴയും ലഭിക്കാവുന്ന കുറ്റമാണ് വനംവകുപ്പ് ചുമത്തിയിരിക്കുന്നത്. വ്യാഴാഴ്ച പുലര്ച്ചെയാണ് ആനയെ എസ്റ്റേറ്റിന് മുന്നിലെ വേലിയില് ചെരിഞ്ഞ നിലയില് കണ്ടെത്തിയത്.
അസുഖം ബാധിച്ച് ഒരാഴ്ചയോളം അലഞ്ഞുതിരിഞ്ഞ് നടന്ന ആന ചെരിഞ്ഞു എന്ന നിലയിലാണ് എസ്റ്റേറ്റ് മാനേജ്മെന്റ് പ്രചരിപ്പിച്ചത്. വൈദ്യുതാഘാതമാണ് മരണകാരണമെന്ന് പോസ്റ്റുമോര്ട്ടം റിപ്പോര്ട്ടില് വ്യക്തമായതോടെ വനംവകുപ്പ് കേസെടുക്കുകയായിരുന്നു. സംഭവത്തെക്കുറിച്ച് ജില്ലാ ഇലക്ട്രിക്കല് ഇന്സ്പെക്ടര് അന്വേഷണം നടത്തുന്നുണ്ട്.
വ്യാഴാഴ്ച രാത്രി സംഭവ സ്ഥലത്തെത്തിയ ഇലക്ട്രിക്കല് ഇന്സ്പെക്ടര് കാര്യമായ തെളിവ് ശേഖരിക്കാതെയാണ് മടങ്ങിയത്. എസ്റ്റേറ്റില് നിന്നും ഒന്നരകിലോമീറ്റര് അകലെയുള്ള ഷെഡില് സൂക്ഷിച്ചിരിക്കുന്ന സ്റ്റോറേജ് ബാറ്ററിയില് നിന്നുമാണ് സൗരോര്ജ്ജം വേലിയിലേക്ക് കടത്തിവിടുന്നതെന്ന് കണ്ടെത്തി.
എന്നാല് എത്ര വോള്ട്ട് വൈദ്യുതിയാണ് വേലിയിലൂടെ പ്രവഹിക്കുന്നതെന്ന് കണ്ടെത്താന് ഇലക്ട്രിക്കല് ഇന്സ്പെക്ടറുടെ പക്കല് സംവിധാനമില്ലെന്നാണ് പറയുന്നത്. സംഭവത്തെക്കുറിച്ച് വിശദീകരണം നല്കണമെന്ന് കാണിച്ച് വനംവകുപ്പ് കത്ത് നല്കിയിട്ടുണ്ടെങ്കിലും മറുപടി ലഭിച്ചിട്ടില്ല.
