ചെന്നൈ : യുഎഇയില് പോകും മുന്പ് തൊഴിലവസരവും പെര്മിറ്റ് വിസയും ആധികാരികമാണെന്നും ഇവ യുഎഇയിലെ നിയമപ്രകാരമുള്ളതാണെന്നും ഉറപ്പാക്കണമെന്ന് ദുബായിലെ ഇന്ത്യന് കോണ്സുലേറ്റ് ആവശ്യപ്പെട്ടു. ഏജന്റ്മാരാല് വഞ്ചിതരായി വിസിറ്റിംഗ് വിസയില് യുഎഇയില് ജോലിക്ക് എത്തുന്നവരുടെ എണ്ണം വര്ദ്ധിച്ച സാഹചര്യത്തിലാണ് ഇത്തരമൊരു നിര്ദേശം.
ദുബായിലെ ഇന്ത്യന് കോണ്സുലേറ്റ് ജനറലിന്റെ കൈവശം കൃത്യമായ കണക്കുകള് ഇല്ലാത്തതിനാലാണ് ഇത്തരം പ്രശ്നങ്ങള് സങ്കീര്ണ്ണമാകുന്നത്. സന്ദര്ശക വിസയില് യുഎഇയിലേക്കും ഒമാനിലേക്കും മറ്റ് രാജ്യങ്ങളിലേക്കും എത്തുന്ന സ്ത്രീകള് സംശയാസ്പദ സാഹചര്യങ്ങളില് ജോലിചെയ്യാന് നിര്ബന്ധിതരാകുന്ന കേസുകളുമുണ്ട്. ഈ വര്ഷത്തിന്റെ ആദ്യ പകുതിയില് കോണ്സുലേറ്റില് തൊഴിലാളികളുടെ 540 ലേറെ പരാതികള് ലഭിച്ചതായും അതില് 250 എണ്ണം പരിഹരിക്കപ്പെട്ടതായും കോണ്സുലേറ്റ് വ്യക്തമാക്കി.
ചില കേസുകളില് തൊഴിലുടമയില് നിന്നും പാസ്പോര്ട്ട് തിരിച്ചു കിട്ടാന് കോണ്സുലേറ്റിന് തന്നെ ഇടപെടേണ്ടി വന്നെന്നും റിപ്പോര്ട്ടുണ്ട്. ഇത്തരത്തില് 2016 ല് 225 വിമാന ടിക്കറ്റും ഈ വര്ഷം 186 എയര്ടിക്കറ്റും ഇന്ത്യന് കോണ്സുലേറ്റ് എടുത്ത് നല്കി.
