കല്പ്പറ്റ: വന്യമൃഗങ്ങള് നാട്ടിലേക്കും, പൊറുതി മുട്ടിയ ജനം കാട്ടിലേക്കും ‘ എന്ന മുദ്രാവാക്യമുയര്ത്തി ബിജെപി ജൂലൈ 31 ന് വയനാട് വൈല്ഡ് ലൈഫ് വാര്ഡന്റെ ഓഫീസ് പരിസരത്ത് വാസസ്ഥലം ഒരുക്കി പ്രതിഷേധിക്കും.
വയനാടിന്റെ പേടി സ്വപ്നമായ വന്യജീവി ആക്രമണത്തെ സംസ്ഥാന സര്ക്കാരും ജില്ല ഭരണകൂടവും നിസ്സാര വല്ക്കരിച്ച് കാണുകയാണ്. വന്യജീവി ആക്രമണത്തിന്റെ പേരില് ജില്ലയില് 3182 കേസുകള് നിലനില്ക്കുന്നു. നൂറു കണക്കിന് ജീവനുകള് വന്യജീവി അക്രമണത്തില് പൊലിഞ്ഞു. നാല്പത് ശതമാനം ഫോറസ്റ്റ് ഏരിയ ഉള്ള ജില്ലയില് കാടും നാടും വേര്തിരിച്ചു കൊണ്ടുള്ള സംവിധാനമൊരുക്കുന്നതിനായി കര്ഷകര് എത്രയോ കാലമായി മുറവിളി കൂട്ടുന്നു.
സംസ്ഥാന ഗവണ്മെന്റിന്റെ ശ്രദ്ധയില് ഈ വിഷയം അവതരിപ്പിക്കേണ്ട ജനപ്രതിനിധികള് തന്നെ തെരുവിലിറങ്ങി സമരം ചേയ്യേണ്ട ഗതികേടിലാണ് ജില്ലയിലെ ജനപ്രതിനിധികള്.
വന്യ ജീവി അക്രമണത്തില് കര്ഷകര്ക്ക് നല്കാമെന്നു പറഞ്ഞ 16.63 കോടി രൂപ വാങ്ങി നല്കാന് ഭരണകൂടത്തിനും സര്ക്കാരിനും സാധിക്കുന്നില്ല. വനം വകുപ്പ് മന്ത്രി ജില്ലയിലെ ഉന്നത ഉദ്യോഗസ്ഥരുടെ യോഗത്തില് നല്കിയ ഉറപ്പുകള് വെറും പാഴ് രേഖകളായി മാറി. കേന്ദ്രത്തിന്റെ പുനരധിവാസ പാക്കേജ് സംസ്ഥാന ഗവണ്മെന്റിന്റെ പിടിപ്പുകേടുമൂലം പാതിവഴിയിലായി. നടക്കാത്ത കാര്യങ്ങളെല്ലാം കേന്ദ്ര ഗവണ്മെന്റിന്റെ തലയില് കെട്ടിവെച്ച് രക്ഷപ്പെടാന് ശ്രമിക്കുന്ന ജനപ്രതിനിധികളാണ് നാടിന്റെ ശാപം. സമരപരിപാടി ബിജെപി സംസ്ഥാന ജന:സെക്രട്ടറി എം.ടി രമേശ് ഉദ്ഘാടനം ചെയ്യും.
വയനാട്ടില് വന്യമൃഗശല്യം രൂക്ഷമായിരിക്കുകയാണ്. രാപ്പകല് ഭേദമില്ലാതെ കാട്ടാനകളും കടുവകളും ജനവാസകേന്ദ്രങ്ങളിലെത്തുന്നു. കാട്ടുപോത്തുകളുടെ ആക്രമണസംഭവങ്ങളും നിസ്സാരമല്ല. കര്ഷകരുടെ തന്നാണ്ട് സമ്പാദ്യം വന്യജീവികള് കവരുന്നത്, അവരെ കൊടുംപട്ടിണിയിലാക്കുന്നു. വയനാട്ടില് 5000ല് അധികം ഏക്കര് കൃഷിഭൂമിയാണ് വന്യമൃഗശല്യത്താല് തരിശ്ശായി മാറിയത്. കഴിഞ്ഞ 30 വര്ഷത്തിനുള്ളില് തിരുനെല്ലി പഞ്ചായത്തില്മാത്രം 78 ജീവനുകളാണ് വന്യജീവികള് കവര്ന്നത്.
350 ആക്രമണ സംഭവങ്ങളും റിപ്പോര്ട്ട് ചെയ്തു. 892 ച.കി.മി വനവിസ്തൃതിയുള്ള വയനാട്ടില് 40ശതമാനവും വനഭാഗമാണ്. 2015-16ല് 3182 വന്യമൃഗ ആക്രമണ സംഭവങ്ങളില് മൂന്ന് ജീവനുകള് പൊലിഞ്ഞു. 2006-2007ല് ഇത് കേവലം 948ഉം രണ്ടുമായിരുന്നു. ഇത് വനംവകുപ്പിന്റെ കണക്കാണ്. തിരുനെല്ലി പഞ്ചായത്തിലെ കാട്ടിക്കുളത്ത് കുഞ്ചലന് എന്ന വനവാസി വൃദ്ധന് കാട്ടാനയുടെ ആക്രമണത്തില് കൊലപ്പെട്ടിരുന്നു.
മനുഷ്യവന്യജീവി സംഘര്ഷങ്ങള് ജില്ലയില് 60ശതമാനത്തോളം വര്ദ്ധിച്ചുവെന്ന് കണക്കുകള് സൂചിപ്പിക്കുന്നു. വന്യമൃഗശല്ല്യം തീരെഇല്ലാതിരുന്ന പല ഭാഗത്തും ഇന്ന് കാട്ടാനകളുടെ വിളയാട്ടമാണ്.ഇതിനുമുന്നില് പതറിനില്ക്കുകയാണ് വനംവകുപ്പും.
