ആലപ്പുഴ: ഹോട്ടലുകളില് ശുചിത്വവും വിലനിയന്ത്രണവും ഉറപ്പുവരുത്തുവാന് ഹോട്ടല് ആന്ഡ് റസ്റ്റോറന്റ് അസോസിയേഷന് മുന്കൈയെടുത്ത് ‘ഓപ്പറേഷന് ക്ലീന് കിച്ചന്’ പദ്ധതി തുടങ്ങി.
ഹോട്ടലുകളിലും ബേക്കറികളിലും ശുചിത്വമില്ലെന്നും അമിത വിലയീടാക്കുന്നുവെന്നുമുള്ള പതിവ് പല്ലവികളില് നിന്ന് ഹോട്ടലുകളെയും ബേക്കറികളെയും സംരക്ഷിച്ച് വ്യവസായത്തെ പിടിച്ചുനിര്ത്തുക എന്ന ലക്ഷ്യവുമായിട്ടാണ് ശുചിത്വത്തിനും വിലനിയന്ത്രണത്തിനും പ്രാധാന്യം നല്കി അസോസിയേഷന് ‘ഓപ്പറേഷന് ക്ലീന് കിച്ചന്’ പദ്ധതിക്ക് രൂപം നല്കിയത്.
അസോസിയേഷനില് അംഗങ്ങളായ ചെറുകിട ഹോട്ടലുകള് മുതല് വന്കിട ഹോട്ടലുകളുടെ വരെ പങ്കാളിത്വമുള്ളതിനാല് ജില്ലയില് വലിയ മാറ്റമാണ് സൃഷ്ടിച്ചിരിക്കുന്നത്. ഹോട്ടലുകള് പരിശോധിക്കാനും ആവശ്യമായ നിര്ദേശങ്ങളും നല്കാന് ഹൈജനിക് മോണിറ്ററിംഗ് കമ്മിറ്റികള്ക്ക് രൂപം നല്കിയാണ് പ്രവര്ത്തനം വിജയത്തിലേക്കെത്തിക്കുന്നത്.
10 അംഗങ്ങളെ ഉള്പ്പെടുത്തിയാണ് സ്ക്വാഡിനാണ് രൂപം നല്കിയിരിക്കുന്നത്. ഇവര്ക്ക് പ്രത്യേക യൂണിഫോമും തിരിച്ചറിയല് കാര്ഡും നല്കിയിട്ടുണ്ട്. അംഗത്വമുള്ള ഏത് ഹോട്ടലുകളിലും ഏപ്പോള് വേണമെങ്കിലും പരിശോധന നടത്തുവാനും ആവശ്യമായ നിര്ദേശങ്ങള് നല്കാനും അധികാരം നല്കിയിട്ടുണ്ട്.
ജില്ലാതലത്തില് രൂപികരിക്കുന്ന സ്ക്വാഡില് താലുക്ക് സമിതി അംഗങ്ങളെയും ഉള്പ്പെടുത്തിയിരിക്കുന്നതിനാല് താലുക്ക്തലങ്ങളിലേക്കും പ്രവര്ത്തനം വ്യാപിപ്പിച്ചിട്ടുണ്ട്. സ്ഥാപനങ്ങളിലെ ശുചിത്വവും വിലയീടാക്കലും മറ്റും പ്രത്യേകമായി പരിശോധിക്കും. പരിശോധനയ്ക്ക് ശേഷം ഹോട്ടലുകളിലെയും മറ്റും പേരായ്മകള് കണ്ടെത്തി മെച്ചപ്പെടുത്താന് ആവശ്യമായ നിര്ദേശങ്ങള് നല്കും. ഹോട്ടലുകളും മറ്റും പരിശോധിക്കുന്ന ഉദ്യോഗസ്ഥരെ സഹായിക്കാനും അസോസിയേഷന്റെ പരിശോധനകളിലൂടെ കഴിയും. അസോസിയേഷന്റെ നിര്ദേശങ്ങള് പാലിക്കാതെ പ്രവര്ത്തിക്കുന്ന സ്ഥാപനങ്ങള്ക്ക് അസോസിയേഷന്റെ ഭാഗത്തുനിന്നും ഒരു സഹായവും നല്കാന് കഴിയില്ലെന്നും ഭാരവാഹികള് മുന്നറിയിപ്പ് നല്കുന്നു.
