കുമ്പള: സര്ക്കാര് ഭൂമി കയ്യേറി വീട് നിര്മ്മിച്ച ലീഗ് നേതാവിനോട് 7 ദിവസത്തിനകം ഒഴിഞ്ഞു പോകാന് തഹസില്ദാര് ഉത്തരവ് നല്കി. മൊഗ്രാല് വില്ലേജില് റീ സര്വ്വേ നമ്പര് 162/1പി. ടി യില് 2.83 ആര് 163/8 ല് 3. 24 ആര് ഗവഃ ഭൂമി കയ്യേറി വീട് കെട്ടി താമസിച്ചു വരുന്ന പേരാലിലെ മുസ്ലിം ലീഗ് നേതാവിനെതിരെ കേരള ഭൂസംരക്ഷണ നിയമപ്രകാരം നടപടി സ്വീകരിക്കാനും, കയ്യേറ്റം ഒഴിപ്പിക്കാനും മഞ്ചേശ്വരം തഹസില്ദാര് ഉത്തരവിട്ടത്.യുവജനസംഘടന നല്കിയ പരാതിയുടെ അടിസ്ഥാനത്തിലാണ് നടപടി.
കോയിപ്പാടി വില്ലേജ് ഓഫീസര് നടത്തിയ അന്വേഷണത്തില് സര്ക്കാര് ഭൂമി കയ്യേറിയതായും കോണ്ക്രീറ്റ് വീട് നിര്മ്മിച്ചതായും കണ്ടെത്തുകയായിരുന്നു. ഇതിന്റെ അടിസ്ഥാനത്തില് കേരള ഭൂസംരക്ഷണ നിയമപ്രകാരം കേസ് രജിസ്റ്റര് ചെയ്ത് ‘എ ‘ഫാറം റിപ്പോര്ട്ട് സമര്പ്പിക്കുകയും ചെയ്തിരുന്നു.
കയ്യേറ്റ ഭൂമി ക്രമവല്ക്കരിച്ചു തനിക്ക് പതിച്ചു നല്കണമെന്ന ലീഗ് നേതാവിന്റെ 2008 ലെ ആവശ്യം നേരത്തെ തന്നെ ജില്ലാ കളക്ടര് തള്ളിയിരുന്നു. പേരാല് സ്കൂള് റോഡിനു പടിഞ്ഞാറ് വശമുള്ള ഭാവിയില് റോഡ് വികസനത്തിന് ആവശ്യമായേക്കാവുന്ന ഭൂമിയാണ് ഭൂമിയാണ് ലീഗ് നേതാവ് കയ്യേറിയിരുന്നത്. കയ്യേറ്റം കുറ്റകരമായി കാണുന്നുവെന്നും റിപ്പോര്ട്ടില് വ്യക്തമാക്കിയിട്ടുണ്ട്.
7 ദിവസത്തിനകം ഒഴിഞ്ഞു പോയില്ലെങ്കില് കയ്യേറ്റം റവന്യു അധികൃതര് നേരിട്ട് ഒഴിപ്പിക്കുകയും സ്ഥലത്തു നിക്ഷേപിച്ചിട്ടുള്ള സാധനങ്ങള് കണ്ടു കെട്ടുമെന്നും 50000 രൂപ പിഴ ചുമത്തുമെന്നും തഹസില്ദാര് നല്കിയ ഉത്തരവില് വ്യക്തമാക്കിയിട്ടുണ്ട്.
