ഗുരുവായൂര്: ക്ഷേത്രത്തില് ദര്ശനത്തിനെത്തിയ ഭക്തയെ തള്ളി താഴെയിട്ട സംഭവത്തില് പ്രതിഷേധിച്ച് ഹിന്ദു ഐക്യവേദി ചാവക്കാട് താലൂക്ക് സമിതിയുടെ നേതൃത്വത്തില് ദേവസ്വം ഓഫീസിലേക്ക് മാര്ച്ച് നടത്തി.
പ്രതിയായ ക്ഷേത്രം കാവല്ക്കാരന് ശിവശങ്കരനെതിരെയും ഇയാളെ രക്ഷിക്കുന്നതിന് പോലീസിനുള്ള അറിയിപ്പില് തെറ്റായ വിവരങ്ങള് രേഖപ്പെടുത്തിയ ഡോ.സവിതക്കെതിരെയും പരാതി ബോധിപ്പിക്കാന് എത്തിയ ബന്ധുക്കളെ പരിഹസിച്ച ഇന്ഷുറന്സ് വിഭാഗം ജീവനക്കാരി ജയശ്രീക്കെതിരെയും നടപടി സ്വീകരിക്കണമെന്നാവശ്യപ്പെട്ടായിരുന്നു മാര്ച്ച്.
ഹിന്ദു ഐക്യവേദി സംസ്ഥാന സെക്രട്ടറി പി.സുധാകരന് മാര്ച്ച് ഉദ്ഘാടനം ചെയ്തു. ജില്ലാ ജനറല് സെക്രട്ടറി പ്രസാദ് കാക്കശ്ശേരി, സോമന് തിരുനെല്ലൂര് എന്നിവര് സംസാരിച്ചു. ക്ഷേത്ര സംരക്ഷണ സമിതി സംസ്ഥാന സെക്രട്ടറി എ.ജഗന്നിവാസന്, പ്രദീഷ് ചാവക്കാട്, ബാലന് തിരുവെങ്കിടം ,ടി.സുരേഷ്, എം.ബിജേഷ്, ഇ.എം.മഹേഷ് എന്നിവര് നേതൃത്വം നല്കി. സംഭവത്തില് അടിയന്തിര നടപടികള് ആവശ്യപ്പെട്ട് അഡ്മിനിസ്ട്രേറ്റര്ക്ക് നിവേദനം നല്കി.
